Samtang nagtan-aw ko sa mga trabahante nga nanghipos sa mga pagkaon sa Foodcourt sa usa ka inila nga mall, akong nakita nga daghan pa gyod kaayo nga mga sud-an ug pagkaon nga nahibilin sa lamesa. Kini maoy hinungdan nga akong gipangutana ang naghipos kon unsay ilang buhaton sa mga nabiya nga mga sud-an ug pagkaon kay alang kanako, mahimo man kaayo kini nga ipakaon sa mga binuhi sama sa iro o iring.
Matod sa naghipos nga wala gibaligya ang mga hinipos nga mga sobrang pagkaon pero nasayod siya nga gilabay lang kini o giapil sa ilang inadlaw nga basura.
Unsa kadaghan diay ang ilang mahipos sa usa ka adlaw, maoy sunod nakong pangutana.
Kuan Sir, dili momenos sa 22 ka sako matag adlaw ang among mahipos nga sobrang pagkaon sa Foodcourt, maoy iyang tubag.
Susmaryosep, pagka-daghan ba diay sa ilang mahipos matag-adlaw unya giapil lang kini sa ilang basura.
Makita dinhi ang dakong pag-usik-usik sa pagkaon taliwala sa kalisod o kanihit sa pagkaon, gawas pa sa problema sa gidaghanon sa basura.
- - -
Adunay pagkaon sa Tondo nga gitawag og “monok.” Ang monok usa ka klase sa pagkaon nga kaduha na lutoa aron mapuslan pa.
Kadtong nag-order og manok sa mga hotel unya dili mahurot, tapukon sa mga waiter ang mga nasobra ug ibaligya sa gawas. Mogawas nga sideline o extra income na kini sa mga waiter.
Ang buhaton sa mopalit, ilang hagpaton ug lainon ang pulos unod gikan sa mga bukog. Templahan ug butangan sa mga lamas o panakot ang pulos unod sa manok dayon i-deep fry kini.
Ang resulta - crispy nga chicken adobo fillet nga himalitan kaayo.
Usa kini sa mga paagi nga mapahimuslan pa ang mga nasobra o nabiya na nga mga pagkaon. Dili ba kaha kini mahimo nga himoon dinhi?
- - -
Daghan ang natingala didto sa Bohol kon ngano nga nahimo man nga putlon ang mga kahoy nga Acacia aron himuon nga gasoline refilling station. Mahimo diay kini nga gidili man unta ang pagpamutol sa mga kahoy?
Apan nahibaw-an atol sa imbestigasyon nga wala na kinahanglana ang permit to cut aron maputol ang Acacia, unya gidasonan usab kini sa taga-DENR.
Lisod sabton usahay ang balaod.
Pwede na diay putlon ang Acacia pero lisod pagputol o pagpanguha sa salago tungod kay giapil pa kini sa gitawag og forest products. Ang salago motubo sa bisan asa nga lugar ug nindot kini nga gamiton isip fiber crop, pang-export ang salago kay usa kini sa material nga himuon alang sa mga kwarta, tseke ug uban pa, apil na ang mga tea bags.
Buot ipasabot, mapahimuslan kaayo ang salago apan subo palandungon nga dakpon ang manguha sa salago tungod kay gidili kini sa balaod, gawas kon gituyo kini pagtanom.
- - -
Parehas sa pag-gamit og plastic. Daghan ang nagpagawas og ordinansa nga nagdili sa paggamit og plastic, ilabi na sa mga merkado ug mga department stores kay matod pa, makadaot kuno sa kinaiyahan.
Mao kuno kini usa sa mga hinungdan sa baha kay ang mga plastic kuno ang motabon ug mopugong sa libre nga pagdagayday sa tubig. Pero ang pangutana, nganong miabot man sa sapa ang mga plastic? Kinsa ug unsay hinungdan nga makita man nato nga maglutaw-lutaw sa dagat o sapa o bisan asa lang nga mga lugar ang mga plastic?
Dili ba diay kini tungod sa kawalay disiplina sa mga tawo nga maoy hinungdan nga bisan asa lang makita ang plastic?
Daghan kaayong gamit ang plastic ug kon ayohon lang kini sa pag-gamit, dili gyod makadaot sa kinaiyahan ang plastic.