Human ginganlan sa nagpadayon nga Senate hearing si Police Captain Allen June Germondo, officer-in-charge sa Tabuelan Police Station, nga bagman ug collector sa giingong ilegal nga small town lottery ni 3rd District Congressman Arnolfo Teves, mohimo usab og kaugalingong imbestigasyon ang Police Regional Office (PRO 7).
Matod ni Police Lieutenant Colonel Gerard Ace Pelare, tigpamaba sa PRO 7, ang imbestigasyon magsentro sa pasangil nga nalambigit ang police official sa ilegal nga kalihukan ni Teves.
Dugang ni Pelare, si Brigadier General Anthony Aberin, hepe sa kapulisan sa PRO 7, nimando na usab kang Germondo nga motunga sa Senate hearing aron manubag sa mga pasangil batok kaniya.
“PRO-7 gave instruction to Capt. Germodo to appear and cooperate with the Senate Inquiry as we also conduct our investigation pertaining to the allegation of his involvement of any illegal activity,” matod ni Pelare.
Una nang nipasangil si Siaton Municipal Mayor Fritz Diaz nga si Germondo maoy gihimong collector sa Negros Oriental Police Provincial Office (Noppo) sa illegal STL nga giingong gipadagan ni Teves.
Apan sa interview sa mga tigbalita kaniya, hugot ni nga gihimakak ni Germondo sanglit dugay na siya nga nadestino sa Cebu Police Provincial Office (CPPO). Niadtong 2020 nahimong hepe sa Sta. Catalina police station si Germondo ug pagka 2021 gibalhin sa Zamboanguita police station.
Sa gipahibawo ni Police Lieutenant Colonel Mark Gifter Sucalit, deputy director for operations sa Cebu Police Provincial Office (CPPO), nahimong hepe sa Oslob police station si Germondo niadtong Oktubre 2022 ug pagka Marso 21 ning tuiga, gibutang nga OIC sa Tabuelan Police Station.