Dul-an sa ka 100 ka mga pamilya ang nangawad-an og pinuy-anan sa duha ka sunog nga niigo sa 58 ka mga balay sa dakbayan sa Sugbo sa Miyerkules, Abril 19, 2023.
Hayan mosaka pa kini nga gidaghanon tungod sa ikatulong sunog nga sa pagsuwat ning taho gikombati pa sa mga bombero.
Ang unang insidente nahitabo mga alas 8:00 sa buntag sa Barangay Pit-os, samtang laing sunog ang niulbo mga ala 1:40 sa hapon sa Barangay Mambaling.
Ang Cebu City Fire Office (CCFO) nagkanayon nga nadawat nila ang alarma sa sunog sa Pit-os sa alas 8:26 sa buntag ug alas 9:01 sa buntag napawong ang kayo.
Way natala nga nakalas apan walo ka mga balay ang naapektuhan.
Sa naapektuhan nga balay, tulo ang hingpit nasunog ug lima ang nakan-an sa kayo. Nagbilin kini sa 13 ka pamilya o 55 ka mga indibidwal nga nawad-an sa ilang pinuy-anan.
Ang CCPO nibutang sa kantidad sa danyos sa kabtangan nga P375,000.
Sa Barangay Mambaling, ang sunog nakaapekto sa dili mominos 80 ka mga pamilya, kinsa nawad-an og pinuy-anan sa sunog sa hapon.
Sa naasoy nga sunog, 35 ka mga balay ang hingpit nga naugdaw ug 15 ang partially burned.
Gideklarar sa CCFO nga napalong ang sunog sa alas 3:05 sa hapon. Walay natala nga nakalas sa sunog sa Mambaling.
Apan usa ka 21 anyos nga lalaki ang bugtong natala nga angol kay naglisod sa pagginhawa atol sa sunog.
Gibanabana nga mokabat sa P3.6 milyunes ang danyos.
Atol ning pagsuwat, laing sunog usab ang niulbo sa Barangay Kalunasan, pasado alas 6:00 sa gabii, hinungdan nga wala pa makuha ang kompletong detalye ning mantalaan.
Ang sunodsunod nga sunog sa dakbayan giila ni Senior Fire Officer 2 Wendell Villanueva, tigpamaba sa CCFO, nga ‘alarming.’
Nitambag ang CCFO sa publiko nga doble nga magmabinantayon sa posibling hinungdan sa pag-ulbo sa kayo ning panahon sa summer nga naglagiting ang kainit sa adlaw.
Atol ning pagsuwat, ang CCFO nagpadayon sa ilang imbestigasyon sa sinugdanan sa pag-ulbo sa tulo ka mga sunog.
