Usa ka opisyal sa kabomberohan sa dakbayan niingon nga posibleng dugay pa mahibaw-an ang tinuod nga hinungdan sa sunog nga miigo sa Grand Residence condominium sa Gov. M. Cuenco Avenue sa Barangay Banilad, dakbayan sa Sugbo, niadtong Biyernes, Abril 14.
Matod ni Senior Fire Officer 2 Wendell Villanueva nga nagpaabot pa sila sa pag-abot sa mga opisyal sa Bureau of Fire Protection (BFP) sa national headquarters aron mohimo sa final investigation report.
“We are expecting people from the national headquarters to be here in Cebu by Friday. Anyway, duna naman tay initial information, kumbaga we are collating pieces of information sa fire scene,” matod ni Villanueva.
Dugang pa niya, sa pagkakaron, ilang gihimo ang spot investigation report, diin ilang gikonsiderar ang tanang posibleng mga anggulo kon giunsa pagdako sa sunog nga milamoy sa 35 ka andana nga imprastraktura.
Matod niya nga nakadungog siya og daghang mga espekulasyon kon giunsa pagsugod ang sunog apan dili nila ibaliwala ang bisan unsang mga teyoriya.
Pagkahuman sa spot investigation report, maghimo sila og progress report. Ang mga datos ipresentar ngadto sa mga opisyal sa BFP gikan sa main office inig-abot nila.
“Siguro mga pila ka-weeks or days makapagawas na ta og resulta unsa gyud ang cause sa sunog,” dugang pa niya.
Giklaro ni Villanueva kon nganong maghuwat pa ang BFP national nga mohimo sa final investigation kay sila mismo, matod niya, nagsunod sila sa protocol.
Matod niya nga tungod kay naugdaw sa kayo ang wala pa mahuman nga condominium building ug nagbilin og dul-an sa P4 bilyunes nga danyos, ang national headquarter maoy moatiman sa imbestigasyon.
Wala hinuon gitumbok ni Villanueva ang kantidad sa danyos.
Sa pasiunang imbestigasyon sa CCFO, pinisik sa welding rod nga niigo sa PVC pipe ang sinugdanan sa kayo. Apan ilang gitataw nga susihon o kompirmahon pa nila kon unsa kini ka tinuod.
Duna sab silay wa pa nakompirmar nga taho nga dunay fire extinguisher sa dapit diin nagsugod ang kayo, apan way kahibawo mogamit. Ang condotel dunay 35 ka andana, di 37, sukwahi sa unang taho.
NAGLISOD
Giangkon ni Villanueva nga naglisod ang kabomberohan sa dakbayan sa ilang pagresponde sa nahitaboan sa sunog.
“Talagsaon kaayo. Kadaghanan sa mga insidente sa sunog nga among giatubang [sa kalayo] nagsugod gikan sa ubos hangtod sa taas, apan niining higayuna, ang kayo nagsugod gikan sa roof deck hangtod sa ubos nga andana,” ingon niya.
Iyang gitambagan ang mga nagplano nga motukod ug padayong nagtukod og mga tag-as nga edipisyo nga siguroon nga adunay safety officer.
“Wala ko nag-ingon nga ang Grand Residences walay security officer apan ang gusto nakong isulti nga kinahanglan nga adunay usa aron masiguro ang kaluwasan sa mga tawo ug sa imprastraktura,” ingon niya.