BLANGKO pa ang kapulisan sa Mandug Police Station sa motibo sa krimen sa pagpusil-patay sa lalaki pasado alas 8 sa gabii, Miyerkules, Abril 19, 2023, didto sa Purok 7, Santiago Street, Barangay Indangan, Buhangin District, Davao City.
Giila sa Mandug Police Station ang biktima nga si Arman Sabaricos Pantorilla, 55-anyos, drayber og tanker, taga Icsama Village, Kilometro 12, Panacan, Davao City.
Base sa inisyal nga imbestigasyon, samtang naglingkod ang biktima sa lingkuranan sulod sa compound sa gas station, giduol kini sa suspek nga nakasakay sa N-Max single motorcycle.
Nasayran nga naka-helmet nga color green/white ang mamumuno, nakasuot sab kini og black/white nga t-shirt, naka-short pants nga kolor itom kinsa daling gipusil kaduha ka higayon nga naigo sa ulo.
Human sa pagpamusil, daling misibat ang suspetsado padung sa wa matino nga direksiyon samtang ang biktima dead on the spot.
Sumala sa Mandug police nga wala pa sila'y matumbok nga suspek ug padayon ang ilang gihimo nga imbestigasyon sa krimen.