Nagdako na kining panagbangi nila ni Cebu City Mayor Mike Rama ug kadagkuan sa Cebu Port Authority (CPA).
Nagsugod kini sa dihang gipahunong sa mga security guard sa CPA ang mga empliyado sa Cebu City hall nga gisugo ni Mayor Rama sa pagpanglimpiyo sa Compania Maritima building.
Nagtuo si Rama nga katungod sa Siyudad ang paglimpyo ug pagpanindot sa maong building tungod kay anaa kini nahimutang sulod sa Cebu City.
Apan ang gibarugan sa CPA mao man ang hukom sa Regional Trial Court Branch 10 ubos kang Judge Soliver Peras nga nihatag sa writ of preliminary injunction pabor kanila.
Maora og natandug ang garbo sa mayor tungod kay iyang gisabut nga gihagit sa CPA ang iyang pagka-mayor sa siyudad.
Mao kini hinungdan nga sa dihang gipalimpiyuhan na usab unta sa mayor ang palibut sa Compania Maritima, gibadlong gihapon sa mga gwardiya ang taga-city hall.
Tungod niini nisamot og kasuko si Rama mao nga iyang gisugo ang iyang mga abogado sa pagsusi kon aduna bay building, health and sanitation, fire, ug ubang mga permit ang mga estruktura sa CPA.
Kining CPA usa ka ahensiya sa national government samtang local government unit ang Siyudad.
Mas makaayo sa mga Sugbuanon nga magkasinabot sila aron sa pag-ugmad sa dili lamang sa atong pantalan apan apil na ang local tourism industry.
Dili maayong ehemplo sa katawhan kining bingkilbingkil sa mga alagad sa katawhan.
* * *
Hain na man si kanhi Bureau of Corrections Director General Gerald Bantag?
Gituhoan na sa kadaghanan nga kon mapakanaug na sa korte ang warrant of arrest batok kang Bantag unya dili siya motahan sa iyang kaugalingon ngadto sa mga tinugyanan sa balaud, motago gayud kini.
Nasayud kita nga suod kaayo siya sa iyang ka-tribo nga Igorot.
Lapad kaayo ang bukiran sa Cordillera nga kataguan niya.
Apan wala ba diay mangandam niini ang mga tinugyanan sa balaod?
Wala ba sila mag-hire og informer nga taga-tribo aron maoy mo-monitor sa kalihukan ni Bantag?
Karong usa na siya ka pinangita sa balaod, wala bay hanaw ang gobiyerno kon hain siya magtago? (mannyrabacal1144@gmail.com)