Tigbakay sa kabarangayan hugot nga gidili sa balaod kon way ordinansa ang local government unit (LGU).
Kini ang pag klaro sa hepe sa Cebu City Police Office (CCPO) subay sa pamahayag ni Cebu City Councilor Pastor ‘Jun’ Alcover sa iyang privilege speech atubangan sa Konseho sa Dakbayan sa Sugbo.
Si Alcover niingon nga ang sabong o tigbakay tipik sa tradisyon ug kultura sa mga Pilipino, ilabi na panahon sa fiesta busa angay nga maklaro ang legalidad.
Matod ni Police Col. Ireneo Dalogdog nga kon basehan ang balaod, kadto lamang legal nga mga buwangan ang gihatagan og pagtugot nga makapahigayon sa sabong.
Hinuon iyang giklaro nga kon dunay ordinansa ang Dakbayan nga magtugot sa mga barangay panahon sa fiesta nga makapahigayon og tigbakay, andam nila kining tumanon.
“Depende ra gyud na sa City Council kon adunay ordinansa ba nga they will allow during fiesta. Pero sa atong balaod gyud, dili gyud na siya legal,” pasabot ni Dalogdog.
Atol sa privilege speech ni Alcover sa Konseho niadtong Miyerkules, Abril 19, 2023, iyang gisugyot ang pagpahigayon og executive session sa Dakbayan aron hisgutan ug maklaro ang legalidad sa tigbakay.
Sa executive session nga gitakda sa Mayo 3, dapiton ang mga representante sa CCPO, mga operator sa mga buwangan, mahilig niini, Cebu City Gamefowl Commission, buhatan sa mayor ug Association of Barangay Councils.
Ang Siyudad, pinaagi sa City Ordinance 1447 of 1993, nag-regulate sa mga sabong sa siyudad.
Niadtong Enero 2020, ang Dept. of the Interior and Local Government (DILG) niluwat og opinyon nga bisan tuod kon dunay gahom ang LGU sa pag-regulate sa mga sabong, duna kini limitasyon ubos sa Presidential Decree (PD) 449 kun Cockfighting Law of 1974 atol sa panahon ni anhing Presidente Ferdinand Marcos Sr. nga hangtod karon wa giamendar.
Matod sa DILG nga duna nay opinyon ang Korte Suprema kalabot sa limitasyon sa gahom sa LGU kalabot sa sabong.
Sa pagkutlo ning balita, wala pa makadawat og imbitasyon si Dalogdog sa ipatawag nga executive session.
Ubos sab sa mao nga balaod, ang kapulisan maoy gihatagan og gahom sa pag-aprobar o pagdili sa sabong.
Sa miaging semana, nakigtagbo si Gobernador Gwendolyn Garcia sa kadagkuan sa Cebu Police Provincial Police (CPPO) human nangreklamo ang mga mayor nga gipangronda ang mga tigbakay nga dunay permiso gikan kanila.
Gusto ni Garcia nga undangon kini sa kapulisan, apan si CPPO Director Col. Rommel Ochave nipasabot nga ang gitugot sa balaod mao lang ang pagpahigayon niini sud sa legal nga mga buwangan.
Sama kang Dalogdog, nihangyo siya sa mga LGU sa pagpasar og mga ordinansa nga maghimong legal niini sa partikular nga panahon, labina sa mga pista.