Human sa mainiton nga panag-atubang kagahapon atol sa final weigh-in, karong udto (oras sa Pilipinas) ato nang masaksihan ang dugay nang gipaabot sa kadaghanan nga mao ang binukbokay sa duha ka boxing superstars nga pulos wala pay pildi sa ilang tagsa tagsa ka professional career.
Gitumbok kining away nila ni undefeated Gervonta “Tank” Davis ug “King” Ryan Garcia sa T-Mobile Arena Las Vegas.
Mahimong mosaka ibabaw sa ring si Garcia, 24, nga medyo biya og gamay pero sa akong pagtuo nga sa pagkakaron siya ang matawag nga better fighter. Anaa kaniya ang bintaha sa gitas-on, kabatan-on, kaabtik ug kakusog.
Apan kon magpatugtog siya sa pansitan unya dili niya mapahimuslan kining atong gihisgutan sa unahan, aw tingalig mahilam-os unya siya sa mga kumo sa 28-anyos nga Davis ug mao na lang unya ang iyang mamat-an nga giisa na ang mga kamot sa iyang kontra.
On paper, ang duha pulos usab dunay power punches nga abtik nga manumbag. Hinuon gihulagway usab nga mas utokan nga moaway si Davis ug dili magpataka og buhi sa iyang kumo ug labaw pang dili magpatuyang og hasmag.
Kini maoy nakita sa mga boxing experts hinungdan nga sagad kanila medyo tua pabor ni Davis kay sa ilang pagtan-aw usa kini ka seasoned fighter.
Sayod si Garcia niini ug ang iyang trainer nga si Joe Goossen. Usa sa ilang estratihiya mao ang pag-ataki sa sayong mga round, pero usa kini ka dakong sugal sa ilang bahin kay makamao man si Davis moaway isip usa ka counter puncher.
Sa iyang gitas-on, mahimong makapahimulos si Garcia sa kahait sa iyang jab nga maoy mo set sa iyang combo, pero dinhi usab masukod ang estamina.
Ang record nagpakita nga sagad sa iyang mga away gipang knockout ang iyang mga kontra, buot ipasabot nga wa siya maanad og hataas nga mga round.
Kini maoy gilantaw sa kampo ni Davis.
Ning awaya, kon kinsa ang epektibo nga maka adjust maoy makaangkon sa bintaha.
Davis by unanimous decision.