Pipila ka mga adlaw ang nakalabay, nakabasa ko og post sa Sugbo Bike Lanes Board kalabot sa pagparehistro sa mga biseklita. Wa kaayo ko maigking kay daghan nang katuigan ang nanglabay, hangtod niadtong aktibo pa kaayo ko sa cycling community, giduso na sab ni.
Apan wa ni napatuman tungod sa pagsupak sa cycling community mismo kay impractical, way gamit.
Ang nakapa shock nako mao ang pagpakuha og lisensya sa mga siklista. Asa mang lugara sa atoang planeta nga palisensyahon ang mga siklista? Kon ipatuman ni, naa sa Pilipinas, naa ra sa Cebu City.
Tinuod, usa ni sa mga discussion sa miaging tuig sa United Kingdom (UK), apan ang public officials wa modayon tungod sa ka way gamit ug anti-cycling pa.
WAY GAMIT
Matod sa mga opisyal sa Board, gamit ni batok sa kawat. Unsa? Ang mga motorsiklo ug four-wheeled nga mga sakyanan, nakawat man lagi? Naa pay GPS kadaghanan apan na-carnap pa. Busa, seguradong di makapugong sa kawat ug di makasulbad sa kinawatay sa biseklita.
Ang mga biseklita dunay parts, sama sa wheelset ug drivetrain ingon man frame o body sa bike.
Kaming mga siklista, in one way or another, mag-ilis o mag-upgrade. Dunay uban pipila ka mga buwan samtang dunay tinuig, depende sa kwarta.
Ambot di na ko makaihap kon kapila na ko nag upgrade, labing uwahi sa akong 29er nga akong napalit niadtong 2018.
Sud sa duha ka tuig, daghan na ko og nailisan nga parts. Puro ni way resibo nga ikapakita as proof of ownership.
Sa pictures, ang akong bike sa 2018 ug 2020 lahi na og nawong.
HASOL
Naghatag lang ni og kahasol, labina sa kabos nga mga siklista nga kada adlaw naggamit sa biseklita nga transportasyon padung sa trabahoan ug pagpauli sa tagsa ka balay. Unya karon, hasulon pa sa pagparehistro sa ilang biseklita? Bisan tuod adto sa barangay diin sila nagpuyo, hasol gihapon.
Daghan sab sa nagbiseklita nga di taga Cebu City apan niagi dinhi, sama sa mga taga south ug north nga ang trabahoan naa sa mga dapit nga kinahanglang labangon pa nila ang Cebu city.
Ilakip sab ni sila og pa register ang di taga Cebu City?
Anti poor, anti bike sab ni nga polisiya kay kinsa pa may ganahan mobiseklita kon sama ni kaestrikto sa rehistrasyon sa mga sakyanan? Unya ra ba, sa bike policies, di man kaming mga siklista nga galingawlingaw lang o kadtong professional riders ang unang maigo, kon di ang mga kabos nga naggamit ani nga matang sa transportasyon.
HUWATA
Naa may giduso nga Senate Bill 1698 o Bicycle Act sa Senado. Huwaton ning balaudnona nga kon mapasar, mahimong balaod, mahimo nang basehanan sa pagpalambo sa cycling community sa Sugbo.
Instead, ipadayon ang safe biking education sama sa pagsul-ob og helmet sa mga mga mag bike. Pagtaod og blinkers ug hugot nga pagpatuman sa traffic laws, apil na sa pagdakop sa mga siklista nga mosupak, sama anang pag counterflow, pag-agi sa sidewalk ug walkway, paglabang bisan di pa turno.
Kani, mas doable pa ni nga mga lakang sa pagkakaron, inay sa pagpatuman sa mga polisiya nga way ayo.