Aduna’y nahitabong karambola human gipangbuntog sa Cebu Institute of Technology-University (CITU) Wildcats ang University of Cebu (UC) Webmasters, 60-57, niadtong Dominggo sa gabii, Abril 23, 2023 sa 1st Mayor Inocentes Cabaron Inter-Collegiate basketball tournament sa Moalboal Covered Court sa lungsod sa Moalboal, Cebu.
Ang karambola, nga na-post sa social media, nahitabo sa gawas sa venue.
Nagkanayon si Cebu Schools Athletic Foundation Inc. (CESAFI) deputy commissioner Danny Duran nga sa ilang nasayran, ang amahan sa usa ka magduduwa sa Webmasters ang nagdugkat sa kasamok.
Ang Moalboal local government nakigtambayayong sa CESAFI aron mapasiugda kining maong kompetisyon.
“Wala nami kabantay kay sa gawas man sa venue nahitabo,” matod ni Duran.
Gipasabot ni Duran nga gimanduan siya ni CESAFI Commissioner Felix Tiukinhoy Jr. nga ipakuha ang police blotter gumikan kay mao kini ang himuon nilang basihan sa ilang umaabot nga panaghugpong aron tukion ang maong hitabo.
“Seguro after sa among meeting, maka-decide ta kon unsa’y angay buhaton,” pasabot ni Duran.
Ang kadaugan sa Wildcats nakahatag og komplikasyon kabahin sa senaryo sa torneyo, nga nagdalit og kapin sa P500,000 nga kinatibuk-ang ganti.
Ang Wildcats ninghuman sa torneyo dala ang 2-2 nga rekord samtang ang Webmasters natagak sa 1-2 nga rekord.
Aduna pa hinuon nahabiling usa ka duwa ang Webmasters batok sa walay daog nga University of San Jose Recoletos (USJ-R) Jaguars (0-3).
Sa kasamtangang sitwasyon, adunay dakong posibilidad nga mag-triple tie sa 2-2 nga rekord ang Wildcats, Webmasters ug University of Southern Philippines Foundation (UFP-F) Panthers (2-1).
Kon mao kini ang mahitabo, hayan gamiton ang quotient system aron pagdeterminar kon kinsa ang makaangkon sa ikaduhang luna sa finals ning single-round robin nga torneyo.
Ang unang puwesto sa finals naseguro nang daan sa CESAFI defending champion University of the Visayas (UV) Green Lancers, nga kasamtangang naghupot og 3-0 nga rekord. (ESL)