Nipagawas na og desisyon ang Cebu Schools Athletic Foundation Inc. (CESAFI) kabahin sa nahitabo nga rambol tali sa Cebu Institute of Technology-University (CITU) Wildcats ug University of Cebu (UC) Webmasters human sa ilang duwa niadtong Dominggo, Abril 23, 2023, sa 1st Mayor Inocentes Cabaron Inter-Collegiate basketball tournament sa lungsod sa Moalboal, Cebu.
Sa opisyal nga memorandum nga pirmado ni CESAFI commissioner Felix Tiukinhoy, ang liga wala ra mopahamtang og silot sa nangahilambigit nga mga magduduwa.
Ningtugot sab ang CESAFI nga mopadayon ang nahisgutang mga tunghaan sa ilang kampanya sa Moalboal tournament, nga adunay sanction sa CESAFI.
Apan gipahimangnuan sa CESAFI ang mga tunghaan nga kon aduna pa’y mahitabo nga susama niini nga kasamok, hayan pahamtangan na og bug-at nga silot ang mga mahilambigit.
“Pending the result of the investigation that we are conducting, teams are sternly warned that any other untoward incident that may happen again in the ongoing Moalboal tournament and future CESAFI-sanctioned tournaments shall be dealt with accordingly, including but not limited to, banning the player or coach from CESAFI or CESAFI-sanctioned tournaments,” tipik sa memorandum sa CESAFI.
Nahitabo ang karambola sa gawas sa venue human sa duwa sa Wildcats ug Webmasters.
Nasayran nga amahan sa usa ka magduduwa sa Webmasters maoy nagdugkat sa kasamok.
Gipabuhagay sa CESAFI nga gikasubo sa liga ang nahitabong kagubot.
Gipahimangnuan sa CESAFI ang mga tunghaan nga ang susama niini nga panghitabo makaapekto sa ilang reputasyon.
Gawas sa Wildcats ug Webmasters, ang ubang teams nga apil sa Moalboal tournament mao ang CESAFI defending champion University of the Visayas (UV) Green Lancers, University of Southern Philippines Foundation (UPSF) Panthers, ug University of San Jose Recoletos (USJ-R) Jaguars.
Ang torneyo nagtanyag og kapin sa P500,000 nga kinatibuk-ang ganti. (ESL)