Sa dihang nag-blessing og bag-o nga barko ang usa ka shipping company karong bag-o lang, ang ilang pinasidunggan nga bisita mao si Senador Raffy Tulfo.
Kon kahinumdoman, ang laing shipping company nga nag-blessing sab sa ilang bag-o nga barko, ang ilang pinasidunggan nga bisita mao si Senador Imee Marcos.
Abtik nga mihirit ang akong amigo nga taga Marina nga basin og mao na ni ang sinugdanan sa usa ka bibo nga presidential showdown.
Daghan ang nagtuo nga kining duha ka mga senador nagpakita og interes nga molansad sa pagka-presidente sa 2028.
* * *
Siyempre, kon adunay mangutana kon apil na ba kini sa ilang plano sa 2028, dali ra sab sila kaayo nga makahatag og maanindot nga tubag, dili mobalibad pero dili sab molikay.
Mao kini ang gitawag nga “neither confirm or deny” ug mogawas nga nagpalutaw pa lang sila sa maong posibilidad. Mahimong molansad, mahimo sab nga dili, depende lang sa bul-og sa sentimento sa mga tawo.
Husto kining maong pamaagi kay kon atong mahinumdoman, dihay usa ka kanhi mayor sa usa ka inilang siyudad nga abtik kaayo nga misulti nga molansad siya pagka-presidente bisan layo pa ang piniliay.
Ang resulta, naukay ang iyang mga gipangbuhat samtang mayor pa siya ug wala ug tuo ang mga kaso nga gisang-at batok kaniya.
* * *
Karon nga nakatilaw na og balik ang katawhan sa kaanindot sa kinabuhi nga walay face mask nga isul-ob sa tanang panahon, kinsa pa kaha ang gusto nga ibalik ang istrikto nga pamaagi sa unang panahon nga mirampa ang Covid-19.
Apil na niini ang pag-limit sa gidaghanon sa mga tawo nga mag-estambay sa usa ka lugar nga naa sa sulod sa building. Human sa panahon nga medyo luag na ug “hayahay na atong panginabuhi,” morag lisod na hunahunaon nga mobalik pa kita sa maong sitwasyon.
Daghan nang leksiyon nga nakat-onan ang katawhan sa pagbuntog sa Covid-19. Wala nay gusto pa nga mobalik pa sa maong klase nga panimuyo nga sama sa pirmi lang gihulga ang atong kinabuhi.
* * *
Adunay usa ka negusyante nga matod pa, kalit lang midako ang ulo ug wala mahimuot niini ang usa ka gobernador
Sa nagsugod pa ang maong negusyante sa iyang negosyo ug nakita nga dako kini og ikatabang sa maong probinsiya, siyempre daghan ang nalipay apil na niini ang mga politiko.
Daghan ang mi-welcome sa maong negosyo sa ilang tagsa-tagsa ka mga lugar ug diha nagsugod ang midako nga plano sa maong negusyante.
Gusto niya sakopon sa hinayhinay ang tibuok probinsiya sa iyang negosyo og usa ka higayon niana, gipatawag niya sa usa ka meeting ang gobernador.
Sa dihang sila na lang duha, gipagawas sa negosyante ang iyang gamay nga booklet ug gibasa ang iyang mga “gustong mahitabo.”
Sirad-an dinhi, sirad-an didto, undangon kini, undangon didto, ug kasagaran sa ipasira ang mga kompetensiya sa negosyo.
Kon buhaton kini, aduna siyay lista sa mga kantidad nga iyang ihatag sa gobernador isip iyang “share” sa ganansiya sa negosyo.
Mahimo nang mabuhi nga hayahay ang gobernador bisan wala na siya sa politika, matod pa sa negusyante.
Hilabihang sukoa ug miulbo ang kaspa sa gobernador sa gibuhat sa negusyante.
Nagpasumangil nga dihay laing meeting ug dali kaayo nga milakaw ang gobernador. Sukad niadto hangtod karon, wala na niya tagai og higayon nga makasulti pa ang maong negusyante kabahin sa iyang negosyo.