Karong Hunyo 12, Independence Day, wa nay makitang basura ug mga tawo nga mangatu’g sa daplin sa karsada sa siyudad sa Sugbo. Mando kini ni Cebu City Mayor Michael Rama nunot sa iyang panglantaw nga mahimong “Singapore-like” ang siyudad.
Di na gustong makakita ang mayor og mga basura ug mga tawo nga nagpuyo sa kadalanan. “June 12, dili na ko gusto makakita og garbage 24/7. June 12, dili na ko gusto makakita og mga tawo nga mangatulog sa dalan,” nagkanayon si Rama.
Hapsay na unya kaayong tan-awon ang siyudad sa Sugbo. Wa nay hugaw ug baho nga basura nga nagkatag sa kadalanan. Wa nay mga tawo nga nangligid sa mga aseras. Dunay solusyon ang taga Cabadiangan aron way mangatu’g sa aseras. Paimnon na sila og daghang kape.
* * *
Wa maghisgot ang mayor kon asa pakatulga kining mga tawo nga nagpuyo sa kadalanan sa siyudad. Pero si Ester Concha, officer-in-charge sa Department of Social Welfare Services (DSWS), miingon nga ila diay silang dad-on sa usa ka temporary shelter sa South Road Properties.
Matod pa ni Concha ilang gi-survey adlaw ug gabii ang mga tawo nga nagpuyo sa kadalanan. Ilang gitabangan og anam-anam. Apan ang uban taga syudad ra ug dunay mga balay.
Dunay mga street dwellers nga gikan sa silingang mga dakbayan. Apan ilang paningkamutan nga limpyuhan ang kadalanan sa maong mga tawo sa di pa moabot ang Hunyo 12 nga ultimatum ni Mayor Rama.
* * *
Sa miaging tuig, miluwat si Mayor Rama sa usa ka executive order nga gitawag og “Oplan Disiplina” nga nag-awhag sa tanan nga magdisiplina arong magpabilin nga hapsay ug malinawon ang siyudad sa Sugbo. Tuman sa tanang mga lagda.
Karong tuiga, gilusad sab sa mayor ang “Oplan Panindot sa Palibot.” Si First Lady Malou Rama maoy nangulo sa beautification campaign sa siyudad nga naglakip sa pagpananom og mga ornamental tree ug pagbutang og mural paintings sa mga barangay.
Laing gilusad sa mayor mao ang pagpanindot sa tres metros nga easement zone sa kilid sa mga sapa. Naglakip kini sa Bulacao River, Estero de Parian, Mahiga River, Lahug River, Guadalupe River, Tagunol Creek, Kinalumsan River ug Butuanon River nga butangan unya og mga access roads, bike lanes, river railings ug concrete pavements.