DAVAO DEL NORTE -- Duha ka mga pulis ang nagpinusilay didto sa Purok 3B, Barangay Capungagan, Kapalong alas 2:30 sa kaadlawon, Sabado, Abril 22, 2023.
Gibutyag nga ang insidente naglambigit tali nila Police Chief Master Sergeant Norman A. Mariveles ug Police Corporal Segundo D. Intia Jr., parehong nadestino sa Kapalong Municipal Police Station.
Base sa inisyal nga imbestigasyon, nasayran nga samtang si Mariveles nagpahigayon og intel monitoring sa nahisgutang barangay isip kabahin sa umaabot nga Araw ng Capungagan, iyang nakita si Intia, kinsa sumala pa, miakusa ug misulay pagpusil kang alyas Estoy apan nikagar ang iyang armas.
Matud pa nga gibadlong ni Mariveles si Intia pinaagi sa pagpabuto isip warning shot. Apan si Intia giingon nga wa maminaw, inay nagpadayon paggukod kang alyas Estoy.
Aron nga mapugngan si Intia, gipusil kini ni Mariveles, hinungdan nga naigo sa walang paa. Apan nakabawos pa si Intia pagpusil kang Mariveles. Maayo na lang kay ang bala didto miigo sa palm tree.
Boluntaryong mitahan sa kaugalingon si Mariveles sa mga nirespondeng mga pulis ug miangkon nga iyang gipusil si Intia ug gitunol niini ang giisyu kaniya nga Taurus 9mm Pistol nga dunay serial number TBW 25248.
Gikompiska sab ang armas nga giisyu ngadto kang Intia nga CANIK 9mm Pistol nga dunay serial number T6472-18BG16441.
Mga armas pulos gisumite ngado sa Davao Norte Provincial Forensic Unit sa Danao Norte Police Provincial Office, Tagum City alang sa ballistic examination.
Giingong si Intia gipatambalan sa Davao Regional Medical Center sa siyudad sa Tagum ug giingon nga anaa na karon sa luwas nga kahimtang.
Si Mariveles gikustodiya sa Kapalong Municipal Police Station ug giandam na ang kasong attempted homicide nga ipasaka batok kaniya.