SIM registration gilugwayan og 90 ka adlaw

GILUGWA­YAN: Human napupos ang tagal sa pagparehistro sa SIM card, ang kagamhanan nakahukom sa pag­lugway og dugang 90 ka mga adlaw human nga wa pa hapit makatunga ang gidaghanon sa mga nagparehistro. Hinuon, nasubay usab kini sa gimbut-an sa balaod. / file
GILUGWA­YAN: Human napupos ang tagal sa pagparehistro sa SIM card, ang kagamhanan nakahukom sa pag­lugway og dugang 90 ka mga adlaw human nga wa pa hapit makatunga ang gidaghanon sa mga nagparehistro. Hinuon, nasubay usab kini sa gimbut-an sa balaod. / file

Gianunsyo ni Justice Secretary Jesus Crispin Remulla sa Martes, Abril 25, 2023, ang extension sa 90 ka adlaw nga pagparehistro sa SIM.

Gihimo kini ni Remulla sa wala pa ipahigayon ang fourth-inter agency meeting sa oil spill sa Mindoro nga dala sa nalunod nga oil tanker.

Matod niya nga ang 90 ka adlaw nga lugway nasabotan atol sa usa ka sectoral meeting sa updates mahitungod sa SIM registration niadtong Lunes, Abril 24, sa Malacañang.

Ang Radio Television Malacañang (RTVM) niingon sab nga giaprobahan ni Presidente Ferdinand “Bongbong” Marcos, Jr. ang extension.

Gibasura sa Department of Information and Communications Technology (DICT) ang panawagan alang sa extension sa SIM registration, nga mahuman unta sa Abril 26.

Kini nagpasabot nga ang dili rehistrado nga mga SIM card ma-deactivate.

Sa Abril 23, ang DICT niingon nga 82 milyunes ka SIM card ang narehistro na gikan sa kinatibuk-ang 168,016,400 ka aktibong SIM sa nasod.

Sa mga rehistradong SIM, kapin sa 37 milyunes ang Globe subscribers, kapin sa 39 milyunes ang Smart subscribers ug kapin sa lima ka milyon ang Dito subscribers.

Target sa DICT nga marehistro ang 70 porsiyento sa mga aktibong SIM sulod sa 90 ka adlaw nga extension.

Ang ahensya nagkanayon nga lakip sa mga hagit sa SIM card registration mao ang kakuwang sa Wi-Fi connection ilabina sa mga hilit nga dapit sa nasod ug ang kakuwang sa identity documents (IDs) sa mga indibidwal nga nagparehistro sa ilang SIM card.

Ang gobyerno naglusad og SIM card registration caravan nga magsilbi sa lagyong mga komunidad. (TPM, SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph