GIPANGITA na karon sa mga awtoridad ang nakasibat nga wala mailhing lalaki kinsa dunay dalanga armas ug shabu dihang giharang unta sa checkpoint sa Purok Namnama, Baramgay Cuambogan, Siyudad sa Tagum ala 1:30 sa hapon, Martes, Abril 25, 2023.
Gibutyag nga ang mga kapulisan sa Tagum City Police Station nagpahigayon og checkpoint sa nahisgutang dapit dihang giharang ang wa mailhing lalaki nga nagmaneho og kolor itom single motorsiklo nga SkyGo nga dunay plaka nga 1101-435924.
Matud pa nga ang maong suspek gipahunong gumikan kay wa kini magsul-ob sa standard nga helmet nga tataw nga nakalapas sa Republic Act Number 10054.
Sumala pa nga gimandoan ni Police Corporal Gedion Alejandro ang suspek nga mokanaug sa gisakyang motor ug gisusi ang sulod sa kolor itom nga sling bag niini ug nasuta nga duna kini sulod nga usa ka yunit nga .38 caliber revolver.
Apan kalit lang miipsot ang suspek sa dihang gipugngan ni Alejandro.
Dugang gibutyag nga sa dihang gihiling pag-usab ang sulod sa nabiling sling bag sa suspek, nasayran nga gawas sa pusil, duna sab kini sulod nga upat ka sachets nga dunay sulod nga gituohang shabu nga gibutang sa gamay nga plastic canister nga nakamarka og doublemint.
Ang druga nga nasakmit gibana-banang dunay gibug-aton nga 0.88 gramo ug nagkantidad og P5,984 ug uban pang mga ebidensiya gikustodiya sa Tagum City PNP alang sa tukmang disposasyon.