MASS vaccination ug ang pagpugong sa maong balatian ang labing gitutokan karon sa Department of Health (DOH)-Davao Region human nga dunay natala nga 49 ka mga kaso sa gisuspetsahang measles-rubella.
Kini gikan sa datus sa bulan sa Enero ngadto sa Abril 1, 2023, subay sa gibutyag sa DOH-Davao Abril 24.
Sa talaan sa DOH-Davao, duha sa 49 ka mga kaso nakompirma pinaagi sa mga gihimong laboratory testing, ug ang unom anaa sa kategorya isip measles-compatible nga ang buot ipasabot usa ka clinical case sa measles apan kulang sa requirements sa mga sampol sa yunit o mga sampol sa ispesimen.
Ang nahibiling 30 ka mga kaso nasuta sa resulta nga "negative" ug gibutang isip non-measles samtang ang nahabilin nga 11 ka kaso pabiling pending nga resulta.
"We were able to detect this through our Regional Epidemiology and Surveillance Unit and the Local Epidemiology and Surveillance Unit. Ito yung mga kaso na-namonitor natin for this year," ingon ni DOH-Davao Assistant Regional Director Dr. Gerna Manatad.
Ang mga lugar nga gikonsiderang anaa isip high-risk sa measles-rubella, gilangkuban sa Davao City, Mati City, Tagum City, Panabo City, Island Garden City of Samal ug Digos City.
Samtang ang mga munisipalidad mao ang Asuncion, Carmen, ug San Isidro sa Davao del Norte nga gilangkuban sab sa Baganga, Governor Generoso, Lupon, San Isidro, ug Tarragona, sa Davao Oriental; Hagonoy ug Padada sa Davao del Sur; Laak, Maragusan, Monkayo, ug Nabunturan sa Davao de Oro, ug Sta. Maria sa Davao Occidental.
"These are our areas which are considered as high-risk because of the presence of measles-rubella cases in their municipality," butyag ni DOH-Davao Regional Director Dr. Annabelle Yumang.
Samtang wala sa'y nakompirma nga mga kaso sa polio sa Davao Region apan sa 2022 dunay 39 ka mga kaso sa acute flaccid paralysis nga di confirmed cases apan gipunting ang mga timailhan ug sintomas sa polio.
"Walay umoy iyang tiil, iyang lower extremities. Dili makalakaw. So kana siya, isa na sa atong gi-monitor," ingon ni Yumang.
Sa miaging mga tuig, naa sa'y natala nga mga kaso sa acute flaccid paralysis, nga dunay 61 cases sa 2021, naay 63 cases sa 2020, ug 93 cases sa 2019.