Ning-abante sa 2nd round ang Miami Heat ug New York Knicks human nila gipalagpot og sayo ang ilang tagsatagsa ka kontra sa managlahing 1st round playoffs series sa National Basketball Association (NBA) ning Huwebes, Abril 27, 2023 (PH time).
Ang Heat ningtaktak sa No. 1 overall ug host Milwaukee Bucks pinaagi sa overtime nga kadaugan, 128-126, sa Game 5 nga maoy nakahuman sa ilang best-of-seven series sa Eastern Conference, 4-1.
Samtang ang Knicks ningmakmak sa host Cleveland Cavaliers, 106-95, sa Game 5 nga nakatiklop sab og sayo sa kaugalingon nilang series, 4-1, sa Eastern Conference.
Nagbangis na sab si Jimmy Butler ug nagpakatap kini og 42 puntos aron pangulohan ang Heat, niamot og 22 puntos si Gabe Vincent samtang nihatag og 20 puntos si Bam Adebayo.
Ang nangaminghoy nga Bucks gipangulohan ni Giannis Antetokounmpo pinaagi sa iyang 38 puntos ug 20 ka rebounds samtang nitunol og 33 puntos si Khris Middleton.
Sa laing duwa, unom ka mga magduduwa sa Knicks ang ningmugna og dobleng numero nga puntos pinangulohan sa 23 ni Jalen Brunson.
Gipangulohan ni Donovan Mitchell ang Cavaliers pinaagi sa iyang 28 puntos samtang niamot og 21 puntos si Darius Garland.
WARRIORS 123, KINGS 116
Gipayukbo na sab sa defending champion Golden State Warriors ang host Sacramento Kings sa Game 5 nga maoy naghatag kanila og 3-2 nga bintaha sa ilang Western Conference 1st round series.
Kini maoy ikatulong sunodsunod nga kadaugan sa Warriors human sila nasugamak sa kapildihan sa nag-unang duha ka mga duwa sa series.
Gipangulohan ni Stephen Curry ang kadaugan pinaagi sa iyang 31 puntos, niamot og 25 puntos si Klay Thompson, nihatag og 21 puntos si Draymond Green samtang nitunol og 20 puntos si Andrew Wiggins.
GRIZZLIES 116, LAKERS 99
Buhi pa ang paglaom sa host Memphis Grizzlies human nila gibawsan ang Los Angeles Lakers sa Game 5 sa ilang kaugalingong 1st round series sa Western Conference.
Napahakan sa Grizzlies ang labaw sa Lakers sa series, 3-2.
Gipangulohan ni Desmond Bane ang Grizzlies pinaagi sa iyang 33 puntos, niamot og 31 puntos si Ja Morant samtang nihatag og 18 puntos si Jaren Jackson Jr.
Ang Lakers gipangulohan ni Anthony Davis pinaagi sa iyang 31 puntos, nitampo og 17 puntos si Austin Reaves samtang nidugang og 15 puntos si LeBron James. (AP)