Hapit na duha ka mga buwan sukad gipatay si Negros Oriental Governor Roel Degamo ug walo ka mga dumadapig apan wala gihapoy kaso nga gipasaka batok kang Kongresista Arni Teves. Hangtod karon igo lang gisuspenso si Teves og duha ka mga buwan tungod sa wala niya pagbalik sa Pilipinas bisan milapas na ang gihatag kaniya nga leave.
Apan kon imong paminawon si Department of the Interior Local Government (DILG) Sec. Benhur Abalos ug si Department of Justice (DOJ) Sec. Crispin “Boying” Remulla, ila gayud nga gibarugan nga ang mastermind sa pagpatay kang Gov. Degamo mao si suspended congressman Arni Teves. Ila man gani kaniadto nga gitawag kini og fugitive nga gibakwi lang usab dayon ni Remulla. Karong bag-o, buot na usab nga ilhong terorista sa DOJ si Arni Teves.
Sa Senate hearing nga gipangulohan ni Sen. Bato dela Rosa, naputos sa pasangil sa nagkalainlaing mga krimen si Teves. Apan nganong wala man siya mapasakai og kaso sa pagpatay sa gobernador ug sa walo ka mga tawo? Wala pa usay kaso kaniya kalabot sa suma pa daghang gipamatay nga taga Negros Oriental.
Kon adunay kamatuoran ang mga pasangil batok sa mga Teves, nganong hangtod karon wa man siya iapil sa kaso sa iyang mga sinugo? Dili man kita makatuo nga kuwang pa kining mga ebedensiya nga ilang gipanghinganlan. Magduda man hinuon ang katawhan nga huyang og dili katuhoan ang ilang nahipos nga mga ebidensiya.
Ang mga Teves aduna baya usay mga tawo nga mitumaw sa maong Senate hearing nga niakusar usab sa mga Degamo. Kon malaygay kining maong kaso, tingali baya hinuon og maminus na ang interes sa katawhan niining ala-mafia nga eksena sa krimen.
* * *
Ang Inter-Agency Task Force (IATF) for the Management of Infectious Diseases nibutang sa mayoriya sa mga dapit sa lalawigan Sugbo ubos sa alert level 2 gikan sa Abril 15 ngadto sa 30, 2023 tungod sa nagpadayong hulga sa COVID-19. Apan gisupak kini ni Cebu Governor Gwendolyn Garcia. Samtang ang IATF maoy kanunay nga sundon kaniadto sa mga local government unit (LGU), apan suma pa sa Kapitolyo nga nahupas na ang ilang katungod.
Samtang moinsister ang IATF nga sila maoy angay sundon, ang gisaligan sa Kapitolyo mao ang Local Government Code. Nangutana ang naglibog nga katawhan sa Probinsiya kon si kinsa ang angay nilang tuhoan. (mannyrabacal1144@gmail.com)