Ang Cebu Provincial Government motugbang sa gidaghanon sa mga Tourist Rest Areas (TRA) nga gitukod sa Department of Tourism (DOT) nga gibahin sa lainlaing mga local government unit (LGU) sa lalawigan sa Sugbo.
Kini ang gianunsyo ni Cebu Governor Gwendolyn Garcia atol sa tigom nga iyang gipatawag nga gitambongan sa DOT officials ug ubang mga national government agencies nga adunay regional offices dinhi sa Sugbo.
Gumikan niini, upat ka mga TRA ang tukoron ni Garcia isip tugbang sa upat ka TRA nga gipundohan sa DOT pinangulohan ni Secretary Ma. Christina Esperanza Frasco aron daghan og kapahuwayan ang mga lokal ug langyaw nga turista nga moduaw sa Sugbo.
“As I had promised your Secretary (Christina Garcia-Frasco), since this should be as always a collaborative effort, if you would put in this many TRAs, then the Province will put in the same equal number,” matod ni Garcia ngadto kang DOT-7 chief of operations Gelena Azis-Dimpas nga unang nigawas sa Sugbo News, media platform sa Office of the Governor.
Sa miaging tuig, sila si Frasco ug Gobernador Garcia nipahigayon sa ceremonial ground breaking sa upat ka TRA sa Sugbo, duha nahimutang sa mga lungsod sa Carmen ug Medellin sa amihanang Sugbo samtang ang duha sa Carcar City ug Moalboal sa habagatan.
Ang mga TRA adunay kahimanan sama sa tourist information center, lounge area, coffee shops, charging station, limpyo nga kasilyas ug shower room, ug Pasalubong Centers diin ang mga lokal makapakita sa ilang mga produkto.
Samtang giila na sa gobernador ang Bogo City nga unang natumbok nga lokasyon sa Kapitolyo alang sa TRA nga gipundohan sa Lalawigan apan wala pa gibutyag sa gobernador kon asa ipahimutang ang laing tulo.
Si Bogo City number 1 Councilor Erwin Rosal sa pakighinabi sa Sunstar Cebu nagkanayon nga dako og ikatabang alang sa ilang siyudad ang TRA sanglit aduna nay lugar nga mahimong kaistambayan ang mga lokal ug langyaw nga turista nga nagpaabot sa ilang pagbiyahe gikan ug paingon sa ilang dakbayan.
Gumikan niini, matod ni Rosal, chairman sa committee on environment sa City Council, makahatag usab kini og maayong imahen sa Bogo City sanglit libre ang pagpahimulos sa mga turista sa maong pasilidad.