Uyon ang mga representante sa kapin 60 ka national government agencies (NGAs) ug government-owned and controlled corporations (GOCCs) sa diskusyon sa gitawag og landmark nga Provincial Ordinance No. 2023-02 nga nagpalig-on sa koordinasyon tali sa Kapitolyo ug mga ahensiya sa kagamhanan.
Si Undersecretary Leonardo Roy Cervantes, chief of staff ni Executive Secretary Lucas Bersamin, nakamatikod usab sa nagkalainlaing ahensya ug GOCC nga kuwang sa pakigtambayayong sa mga provincial government.
“There’s a thirst for collaboration. In fact, ang dating, welcome sa kanila yung makipag-usap sa Provincial Government. Yun naman yung thrust nung ordinance. We see that need for collaboration, coordination,” padayag ni Cervante.
Siya nagsilbi nga independent observer atol sa meeting, kinsa direktang motaho kang Bersamin bahin sa iyang naobserbahan sa tigom nga naghisgot sa maong ordinansa.
Una niini, sila si Interior Secretary Banjamin Abalos ug Special Assistant to the President (SAP) Anton Lagdameo niduaw kang Garcia sa Kapitolyo ug ang tulo ka mga opisyal nagbinayloay sa ilang mga ideya.
Niadtong Abril 5, gilagdaan ni Gobernador Gwen Garcia aron mahimong balaod sa probinsiya ang ordinansa nga nag-require sa NGAs ug GOCCs nga mokonsulta, mo-coordinate, ug mangayo una og pagtugot sa Kapitolyo sa dili pa sila mopatuman sa bisan unsang programa o proyekto sa Probinsiya sa Sugbo.
Gipalig-on niini ang mga probisyon sa Local Government Code of 1991 partikular ang Sections 2C, 25B, 26, ug 27 nga nagmando sa NGAs ug GOCCs aron makig-coordinate, magkonsulta, ug maapil ang Probinsya sa pagplano ug pagpatuman sa ilang mga programa ug proyekto sa Sugbo.
Base sa report sa Sugbo News, media platform sa Office of the Governor, nga silang tanan adunay consensus sa pagdawat sa ordinansa, niingon nga kini makapasayon sa pagpatuman sa ilang mga programa ug proyekto tungod kay makakuha man sila og inputs gikan sa Kapitolyo.
Ang gobernador gusto nga mahan-ay ang mga programa ug proyekto gikan sa national nga ipakanaog paingon sa local aron dili na masubli ang mga palpak nga implementasyon sama sa gihimong infrastructure project sa UN Avenue sa Mandaue City, nga dugay nahuman.
Gitrabaho man tuod apan naigo sa contractor ang linya sa National Grid Corporation of the Philippines (NGCP).
Gisegundahan kini sa Bureau of Animal Industry (BAI) human sa pagtumaw sa isyu sa African swine fever (ASF) diin si Garcia wala makauyon nga way koordinasyon sa Kapitolyo ang pagpahamtang sa “culling” sa mga baboy nga naa sa sulod sa 500-meter radius bisan wala masakit.