Nalipay kong nakakita sa mga bike patroller sa Sugbo Bike Lanes Board nga nangunay sa pagpara sa mga nagbiseklita sa kadalanan aron pagpahibawo sa ordinansa ug pag-edukar kanila.
Ilang giedukar ang mga nagbiseklita kalabot sa mga lagda sa ordinansa sa Siyudad nga gipasar niadto pang 2014 apan wa napatuman gilayon. Kon wa pa ang administrasyon ni anhing mayor Edgardo Labella, gilumotan ug gikalimtan na kini nga ordinansa.
Kay iya man kini nga ordinansa, si Mayor Michael Rama nipadayon niini sa iyang administrasyon. Nahaum baya ni sa iyang tumong nga Singapore-like nga Cebu City.
Maayo ang gibuhat sa bike patrollers sa pagpara sa mga nagbiseklita ug pag post og mga kasayuran kabahin sa city ordinance ug unsa ang importanteng mga nalatid niini.
Sagad sa mga probisyon niini gikan namong bikers nga nakuha pinaagi sa kolaborasyon tali sa nangaging mga opisyal ug sektor sa mga siklista. Busa, kani nga ordinansa di lang pataka.
Apan ambot lang kon diin gikan ning pagpalisensya sa mga magbiseklita kay sa akong natambungan nga mga meeting kaniadto wa man ni namo mahisguti samtang gi-lobby namo ug gipanday ang ordinansa.
DI SAYON
Sama sa pagbiseklita, ang pagpatuman sa Cebu City bike ordinance di masayon. Tingali, kon nasugdan ni kaniadto ug wa maputol ang termino ni Mayor Michael Rama sa 2016, hayan naedukar na og maayo ang publiko kabahin sa ordinansa.
Di sayon ang pag-edukar sa mga siklista, apil na ang di magbiseklita. Base lang sa among kasinatian, di tanan motuman sa no helmet, no ride.
Apan kay niinsister man gyud mi nga di mi magpa ride kon way helmet, tanang nangapil sa among night ride nag helmet na. Maulaw man sila nga sila ray naglahi kay kinabag-an nag helmet.
Sunod namong gipatuman mao ang no blinker, no helmet, no ride. Wa sab nituman diha-diha ang tanan. Apan sa ngadto ngadto, amoang nakombinser ang mga nangapil. Tanan nagtaud na og blinkers ug nagpanindotay pa.
Tipik kadto sa edukasyon sa mga siklista ug niinsister mi nga ang riders motuman aron makakuyog.
Di mi manglarga basta dunay mokuyog nga wa nituman sa amoang polisiya sa night ride.
MOSUNOD RA
Busa kaning pagpatuman sa mga probisyon sa ordinansa sa biseklita sa Cebu City tumanon ra kon motapos na ang patrollers sa info drive ug edukasyon ngadto sa pagpatuman sa mga probisyon sa ordinansa.
Way dautan sa pagpasul-ob og helmet ug pagpataud og blinkers sa mga biseklita. Alang ni sa kaayuhan sa bike riders. Ang pagpanakop sa mga malapasong drivers nga nagbabag sa bike lanes mag inspire usab sa mga siklista sa pagsubay sa bike lanes.
Kon makita kini sa mga siklista, segurado kong malipay ug mapugos sila sa pagtuman sa ordinansa.
Hangtod man gud karon, daghan pa ang malapason sa balaod sa trapiko sa Siyudad. Apan ang pagpahamtang og silot maoy paagi sa behavior modification o pagpausab sa batasan sa usa ka tawo, ning aspetuha bati kaayo.
Bike patrollers, padayon lang sa inyong gibuhat.