Moabot sa 74 ka mga pamilya sa lungsod sa Argao, habagatang bahin sa Sugbo, ang bag-o lang migradwar sa Pantawid Pamilyang Pilipino Program (4Ps).
Kini nagpasabot nga ang mga benepisyaryo nipaspas gikan sa pagka-survive o subsistence level ngadto sa pagka-self-sufficient.
“The graduation was a celebration of success. This means for the betterment of their families,” matod ni Department of Social Welfare and Development (DSWD) information officer Kerwin Macopia ngadto sa SunStar Cebu, Sabado, Abril 29, 2023.
Matod ni Macopia, tungod kay nakab-ot na sa 74 ka mga panimalay ang self sufficiency level, siya naglaum nga ang mga pamilya makasugod alang sa mas maayong kinabuhi.
“Through the program, we are investing human capital. Puhon kining mga bata maka- human og eskuwela ug makatrabaho, makatabang sa ilang pamilya,” dugang niya.
Aron makonsiderar nga self-sufficient household, ang mga 4Ps households kinahanglang adunay igong kita inig gradwar ug makasugakod sa ilang inadlaw nga panginahanglan base sa social welfare development indicator sa DSWD.
Gidayeg ni Argao Mayor Allan Sesaldo ang social welfare agency alang sa cash assistance ug uban pang angay nga interbensyon sa mga benepisyaryo sa 4Ps.
“Mapasalamaton pud ang lungsod sa Argao sa mga benepisyaryo sa 4Ps nga naningkamot nga makapahuman sa ilang mga anak pinaagi sa tabang sa programa. Ang 74 nga ni-graduate karon kay timaan sa success sa programa,” matod ni Sesaldo.
Alang sa usa ka panimalay nga adunay tulo ka mga anak, ang usa ka panimalay mahimong makadawat og P1,400 matag bulan, o total nga P15,000 matag tuig sulod sa lima ka tuig.
Nisaad usab ang mayor sa lungsod nga ang konseho sa munisipyo motabang sa pagpatunhay sa kaayohan sa mga gradwado sa 4Ps pinaagi sa nagkalain-laing hinabang sa panginabuhian ug kahigayonan sa pagpanarbaho uban sa pakigtambayayong sa ubang ahensya sa gobyerno.
Lakip sa mga hingtungdan nga ahensya nga motabang sa mga kanhi benepisyaryo sa 4Ps mao ang Department of Labor and Employment (Dole), Department of Trade and Industry (DTI), ug pipila ka pribadong sektor.
Si Macopia nibutyag nga atol sa gradwasyon, niabot na usab sa 618 ka rehistradong 4Ps households ang nanumpa ubos sa programa.
“Aside sa ni-graduate ato, naa pud ta gipasulod nga mga bag-ong 4Ps beneficiaries. Replacement nato sila sa mga nihawa sa programa. So, another families will receive the cash assistance,” sigon niya.
Ang 618 ka benepisyaryo opisyal nga mahimong kabahin sa programa, ug makadawat sila og cash grants bugti sa pagsunod sa mga kondisyon sa programa sugod sa Septiyembre.
Ang ubang local government units sa Central Visayas mopahigayon usab og ilang kaugalingong 4Ps ceremonial graduation ug mo-welcome usab sa mga bag-ong batch nga 4Ps beneficiaries.
Ang 4Ps mao ang nag-unang programa sa gobyerno sa pagpakunhod sa kakabos, nga namuhunan sa kahimsog, nutrisyon, ug edukasyon sa mga panimalay nga ubos ang kita.
Kini, inubanan sa psycho-social ug educational nga mga sangkap nga gihatag sa Family Development Session (FDS), moresulta sa kauswagan ug malahutayong kaayohan sa mga benepisyaryo. (KJF)