Ang representante sa Laguna maoy nisakmit sa bag-ong korona sa Miss Philippines Earth 2023 sa coronation night nga gipahigayon sa dakbayan sa Toledo niadtong Sabado sa gabii, Abril 29, 2023.
Si Yllana Marie Aduana, taga lungsod sa Siniloan, probinsiya sa Laguna, maoy gikoronahan isip Miss Philippines Earth 2023 tali sa 28 ka mga kandidata.
Ubang mananaog mao sila si Miss Philippines Air 2023 - Kerri Reilly, taga Mangatarem, Pangasinan; Miss Philippines Water 2023 - Jemimah Joy Zabala, taga Puerto Princesa City; Miss Philippines Fire 2023 - Sha’uri Livori, representante sa Filipino Community sa Melbourne, Australia; ug Miss Philippines Ecotourism 2023 - Athena Auxillo, taga Toledo City.
Ang lima mitubag sa final question nga, “What would the future generation say to your generation?.”
Si Robi Dominggo maoy celebrity host sa maong show diin parehong segment hosts sila si Miss Earth 2014 Jamie Herrell ug Miss Earth 2008 Karla Henry.
Malampuson ang unang higayon sa pag-host sa Toledo sa nasudnong indigay sa kaanyag. (HBL)