Naglagiting karon ang kainit sa adlaw nga daw modu’t sa bukog. Giawhag ang mga tawo nga likayan ang pagbuwad sa init.
Gani, sa malampusong Central Visayas Regional Athletic Association (CVIRAA) 2023 sa siyudad sa Carcar, gipahunong sa Department of Education (DepEd) ang outdoor sports gikan sa alas 9:00 sa buntag hangtod sa alas 3:00 sa hapon.
Kon magpadayon ang kainit sa adlaw nga atong masinati karon, takwahaw lang nga moabot kanato ang usa ka dakong huwaw. Gitawag kini nga El Niño phenomenon. Minos na ang uwan busa hayan mahubsan ang mga tinubdan sa tubig.
Usa ka meteorologist sa Philippine Atmospheric, Geophysical and Astronomical Services Administration (Pagasa) niingon nga angay kining pangandaman sa katawhan. Kay dako kini og epekto sa panglawas ingon man sa mga pananom sa atong mga mag-uuma.
* * *
Si Engineer Alfredo F. Quiblat Jr., hepe sa Pagasa Visayas, miingon nga ang ulohang buhatan sa Pagasa nitaho nga ang posibilidad sa El Niño mitubo gikan sa 55 porsyento ngadto sa 80 porsyento gikan sa Hunyo ngadto sa Septiyembre ug 87 porsyento gikan sa Nobiyembre hangtod sa Enero.
Busa angay mangandam ang mga mag-uuma pinaagi sa pagtanom sa mga tanom nga di magkinahanglan og daghang tubig ug makalahutay sa taas nga ting-init. Sa mga mag-uuma nga nagsalig sa tubig sa sapa, bantayan gihapon kay hayan maughan ang mga sapa.
Wa pa ideklarar sa Pagasa ang El Niño. Apan matod pa ni Quiblat, ang unang timailhan niini mao ang kakuwang sa uwan. Wa magpasabot nga wa nay uwan. Mouwan gihapon apan lagi panagsa na lang.
* * *
Laing apektado sa kaminos sa uwan mao ang supply sa tubig sa Metropolitan Cebu Water District (MCWD) nga nagserbisyo sa walo ka mga local government units sa Metro Cebu nga adunay 224 ka barangay, apan 163 ra ka barangay ang dunay koneksyon sa tubig.
Si Minerva Gerodias, tigpamaba sa MCWD, miingon nga ang ilang water supply mikunhod na og 11,000 cubic meters kada adlaw. Apektado sa maong pagkunhod sa supply sa tubig ang 12,500 ka water connections.
Ang tubig gikan sa Jaclupan Dam sa Talisay City nikunhod gikan sa 30,000 cubic meters (cbm) ngadto sa 25,000 cbm kada adlaw, samtang ang sa Buhisan Dam, gikan sa 5,000 cbm ngadto sa 3,500 cbm kada adlaw. Ang water facility sa Mactan Rock sa Compostela katunga na lang ngadto sa 5,000 cbm kada adlaw. Kon way uwan, mograbe pa ni.