Siyudad sa Sugbo planong magtukod og parking bldg.

Ang multi-storey parking building ug dugang luna sa parking spaces ang gilauman nga makasulbad sa problema sa parking area ug kahuot sa trapiko sa dakbayan sa Sugbo, kini nunot sa pag-amendar sa zoning ordinance sa dakbayan.

Giaprobahan sa Cebu City Council sa ikatulo ug katapusang pagbasa ang gisugyot nga ordinansahon nga nag-ulohan og “An Ordinance Amending Article II, Section 2, Article V, Sections 18, 12.1, C) and 12.2 and Article IX, Section 5, of City Ordinance No. 1656, Otherwise Known as the 1996 Revised Zoning Ordinance of the City of Cebu,” atol sa regular session niini niadtong Miyerkules, Abril 26, 2023.

Ang amendment ordinance gimugna ni Cebu City Vice Mayor Raymond Alvin Garcia.

Ang pag-amendar nagtugot sa Cebu City Government sa paggamit sa trust fund ubos sa account sa parking area requirement exemption fees alang sa pagpalit og mga lote diin ang mga pampublikong parking area o building mahimong tukuron.

Sa wala pa gihimo ang pag-amendar, gitugotan lang sa 1996 Revised Zoning Ordinance ang City Hall nga makatukod og parking building, apan wala kini maghisgot kon makapalit ba ang gobyerno og mga lote.

Si Garcia, sa usa ka pakighinabi niadtong Dominggo, Abril 30, niingon nga sa padayon nga pag-uswag sa dakbayan, isip sentro sa patigayon ug komersiyo sa metropolitan, gikinahanglan ang pagtukod og parking building ug mga luna nga magsilbi sa mga motorista ug turista pagbisita sa siyudad.

Si Garcia niingon nga gawas sa daghang parking side sa karsada, wa pay kasamtangan nga public parking building sa siyudad, ilabi na sa downtown area.

“Anywhere you go in the downtown area, it’s hard to look for parking spaces, so we really need a couple of parking building in the downtown area. With the amendment of the ordinance, we can finally look for a lot and build a parking building,” matod ni Garcia.

Uban sa pagtugot sa Konseho ug pagkahuman sa pagpirma sa mayor sa ordinansa, ang kagamhanan sa siyudad mahimo na nga magpadayon sa pagpangita ug pakigsabot sa mga tag-iya sa lote kon diin matukod ang mga parking building.

Matod ni Garcia, gidawat usab sa Siyudad ang bisan unsang sugyot sa joint venture agreement gikan sa mga tag-iya og lote alang sa pagtukod sa mga parking space.

Gidugang niya ang mga parking side sa karsada nakatampo usab sa kahuot sa trapiko.

Si Garcia niingon nga ang parking building makadasig usab sa mga kustomer ug mga bisita sa pag-adto sa downtown nga makaayo sa mga business establishment nga nahimutang sa maong lugar.

Si Garcia, kinsa mangulo usab sa Zoning Board, niingon nga sa pagkakaron, ang trust fund nga naglangkob sa parking area requirement exemption fees adunay kantidad nga P20 milyunes, nga igo na nga ipamalit og mga lote ug makatukod og parking building.