MISTERYO alang sa mga molupyo sa Sitio Lembas, Barangay Blensong, North Upi, Maguindanao del Norte ang usa ka bato nga giingong nagtubo.
Sumala pa nga namatikdan nga samtang nanglabay ang panahon, hinay-hinay sab nga midako ang bato nga porma og baliktad nga puso sa saging.
Matud pa sa mga katigulangan sa Sitio Lembas nga gamay ra ang maong bato kaniadto apan nahibulong na lang sila kay sa paglabay sa panahon hinay-hinay na kining midako kon diin gitawag nila kini og Lembas.
Gikanayon nga hilit nga lugar ang Sitio Lembas hinungdan nga wala kaayo maadtoan og mga tawo o turista ilabi na nga motorsiklo lamang ang masakyan aron nga makaabot sa nahisgutang lugar.
Apan giingong ang lugar usa ka nindot nga dapit nga suroyan, ilabi na karong summer season tungod sa kanindot sa kinaiyahan.
Gawas sa giingong nagtubo nga bato, makita sab sa ubos nga bahin sa bungtod ang nindot nga tourist spots sa Maguindanao ug Cotabato City.
Hinuon, gisusi na sa Ministry of Tourism sa Bangsamoro Autonomous Region in Muslim Mindanao ang giingong nagtubo nga bato sa Sitio Lembas nga posibleng dakong atraksiyon alang sa turismo.