Ang Provincial Development Council (PDC) sa Sugbo niaprobar sa P96 bilyunes nga mga programa ug mga proyekto sa 21 ka national government agencies (NGA) nga nagbase sa Sugbo.
Ang PDC nga gipangulohan ni Cebu Governor Gwendolyn Garcia maoy moduso niini ngadto sa Regional Development Council (RDC 7) alang sa ilang pagtugot.
Si Garcia nipatawag og tigom sa mga representante sa NGA ug Government Owned and Controlled Corporations (GOCC) niadtong Abril 27 aron ipaila-ila kanila ang Provincial Ordinance No. 2023-02 nga nagmando kanila nga mohimo og konsultasyon, kooperasyon ug mangayo og approval sa Sangguniang Panlalawigan sa mga programa ug proyekto nga ilang ipatuman.
“We hope things will not have to come to a head here because by that time we will already fully be implementing SP Ordinance 2023-02. Why are we doing this? Kay kita man diri, we are the ones on the ground and we are answerable to the people,” matod ni Garcia atol sa tigom.
Ang tigom nga gipatawag ni Garcia gitambungan sa di momenos 60 ka NGAs ug GOCCs.
Si Mayor Sun Shimura sa Daanbantayan ug presidente sa League of Municipalities in the Philippines-Cebu Chapter, nihulagway nga halandumon ang maong panagtigom sanglit way bisan usa ka NGA ang nisupak sa PO 2023-02.
Atol sa pagsuwat niining balita, wala pa matino kon asa sa mga NGA ang adunay labing dako nga pundo alang sa ilang mga programa ug proyekto nga maoy ilang gamiton alang sa sunod tuig
Ang mga dokumento gikan sa nagkalainlaing mga NGA giduso na ngadto sa Cebu Provincial Planning and Development Office (CPPDO) apan wala pa sila makahatag og kopya ngadto sa mga tigbalita.