Human sa Suroy Suroy Sugbo Northern Escapade sa Abril, laing Suroy Suroy na sab ang giandam sa Kapitolyo alang sa 2023.
Gipahibalo sa Kapitolyo nga dunay tulo pa ka mga hugna sa tourism caravan ning tuiga.
Ang Provincial Tourism Office (PTO) nibutyag nga ang Suroy Suroy Sugbo gikatakdang sa Hunyo sa kasadpang bahin sa probinsya.
Nganlan kini og ‘Explore the Midwest’ diin mosuroy ang mga turista ug bisita sa lungsod sa Aloguinsan, Pinamungajan, Balamban, Tuburan, Asturias ug Tabuelan ingon man sa siyudad sa Toledo.
Samtang sa Septiyembre, ang Suroy Suroy ipahigayon na sab sa highly urbanized cities.
Matod ni Maria Lester Ybañez, hepe sa PTO, ang Suroy Suroy Sugbo Urban Adventure nahimo na kini kaniadto sa unang mga term ni Gobernador Gwendolyn Garcia kon diin ang gisuroy niini mao ang mga siyudad sa Mandaue ug Cordova.
“And this time we will embrace Lapu-Lapu city and Cebu city,” matod ni Ybañez.
Sa Nobiyembre, ang tourism caravan ipahigayon na sab og balik sa mga lungsod sa habagatan o ang Southern Heritage Trail.