Langkaton na’g suway sa University of the Visayas (UV) Green Lancers ang kampyunato sa ilang pagpakigbatok og balik sa University of Southern Philippines Foundation (USPF) Panthers ning Miyerkules, Mayo 3, 2023, alas 6:30 sa gabii, sa 1st Mayor Inocentes Cabaron Inter-Collegiate Basketball Tournament finals series sa Moalboal Municipal Gym sa lungsod sa Moalboal, Cebu.
Ang Green Lancers, nga maoy kampyon sa Cebu Schools Athletic Foundation Inc. (CESAFI), magbawon og taas nga morale ning sangkaa tungod sa ilang dakong kadaugan sa Game 1, 79-62, sa best-of-three series.
Gipasabot ni Green Lancers coach Gary Cortes nga ilang paninguhaon nga mahuman na nila ang series ning higayuna aron makapahuway pa sila alang sa ilang kampanya sa umaabot nga Private Schools Athletic Association (PRISAA) sugod karong Mayo 6, 2023.
“Kinahanglang madaog namo ugma (karon) para makapahuway sab mi para sa PRISAA,” matod ni Cortes.
Gisuwayan pagkontak ning mantalaan si Panthers coach Alan Cabatingan apan pakyas.
Hinuon gitataw ni Cortes nga dili pa nila maseguro ang tanan gumikan kay aduna say saktong ikabuga ang Panthers.
Sa ilang sangka sa elimination round, niagi pa og overtime una nabuntog sa Green Lancers ang Panthers, 82-75.
Ang kampyon ning maong torneyo makabulsa og P200,000 samtang ang 2nd placer makadawat og P150,000.
Ang 3rd placer, nga nakuha na sa University of Cebu (UC) Webmasters, adunay P100,000 nga ganti. (ESL)