ANGAY mangandam sa umaabot nga El Niño nga gituohang mahitabo sa buwan sa Hunyo ngadto na sa Agosto.
Kini subay sa El Niño Alert sa Philippine Atmospheric, Geophysical and Astronomical Services Administration (Pagasa) nga gi-isyu, kagahapong adlawa, Martes, Mayo 2, 2023.
Sumala sa Pagasa, ang El Niño Alert dunay 80 porsiyento nga mahitabo kini nga gituohang magsugod na sa sunod nga bulan ug dunay posibilidad nga molungtad pa gayod sa unang kuwarter sa 2024.
Ang ting-huwaw naghulagway kini sa talagsaon nga mas init kaysa kasagaran nga temperatura sa ibabaw sa dagat sa sentro ug silangang equatorial pacific.
"However, over the western part of the country, above-normal rainfall conditions during the Southwest Monsoon season or Habagat may be expected," ingon sa Pagasa.
Ang huwaw maoy gikabalak-an sa mga Dabawenyo tungod kay makaapekto kini sa pipila ka sektor sa rehiyon, apil na ang sektor sa agrikultura, partikular na ang mais, pag-ubos sa produksiyon sa utanon, ug mga high-value crops.
Ang Department of Agriculture (DA) sa Davao Region niingon nga ilang gi-monitor ang non-vulnerable ug vulnerable areas sa El Niño.
Ang pipila sa ilang mga interbensiyon naglakip sa pagpatuman sa mga gawi sa pagdugang sa produksiyon ug cloud seeding aron mamenosan ang mga epekto niini.
"We are trying to prepare kung unsa man ang mga needed for the months na muabot ang El Niño. Dili nato pwede ingon na sayon ra ni kay pagkaon man gud ang involved,” ingon ni DA-Davao regional director Abel Monteagudo.