Kon daghan na karon ang nagbagotbot sa LTO tungod sa problema sa kakulang sa plastic para sa mga lisensiya sa mga drivers sa tibuok nasod, mas modaghan pa gyod ang mobagotbot kon matinuod ang gikahadlokan sa kadaghanan nga bisan ang mga plaka sa sakyanan adunay dakong problema sab.
Kini mao ang problema sa supply sa plaka alang sa mga motorsiklo ug problema sa plaka alang sa 4-wheeled nga mga sakyanan.
* * *
Kon karong panahona, adunay aplikante para mokuha og driver’s license, mobayad sa tanang balayronon, mo-attend sa tanang mga kalihukan alang sa pag-proseso sa lisensiya ug mosunod sa tanang gimando sa LTO, seguradong moulbo ang iyang kaspa kay walay ikahatag ang LTO nga plastic license.
Papel nga temporaryo lang usa kay nahutdan ang LTO og plastic.
Dili na lang nato tas-on pa ang diskusyon pero klaro kaayo nga adunay problema sa kaulohan sa LTO.
Karon, madugangan na sab ang problema kay hasta kuno ang mga plaka alang sa mga sakyanan nahutdan na sab og dili na makahatag og mga plaka ang LTO bisan pa kon nakabayad na ang aplikante niini.
Dili kay karon pa kini nahitabo kay nahitabo na sab kini sa unang panahon. Nagkulang sab ang mga plaka sa una ug bisan unsa na lang ang gi-rason sa LTO mahitungod niini. Ang nakapait ra ba kay nadawat na sa LTO ang bayad, pero walay giuli ang LTO ngadto sa mga aplikante bisan pa man kon wala nila mahatag ang angay unta nila nga ihatag.
* * *
Unsa man kuno ang rason sa matod pa, pagka-kulang sa supply sa plaka?
Matod pa, adunay wala pagka-sinabot sa “taas” kon kinsa ang mo-supply sa plaka.
Tungod niini, adunay sama sa tug-of-war nga gihimo aron pagseguro nga ang ilang paborito nga supplier maoy modaog.
Susmariosep, basin laman ug dili tinuod kining tanan.
Pero bisan pa man, klaro kaayo nga adunay dakong problema sa ibabaw kay kanang problema sa plastic ug sa mga plaka balik-balik na kining maong problema. Ordinaryo na kini nga isyo ug naandan na kining buhatunon sa taga-LTO. Dili husto nga ma-agrabyado ang katawhan nga nagbayad sa husto tungod lang sa problema sa pagpili og supplier.
Dili sab husto nga pasagdan lang kining maong problema kay luoy sab ang lokal nga mga opisinahan sa LTO nga madamay lang intawon sa mga kasikas didto sa taas.
Angay gyod nga imbestigahon kining maong problema aron mahibaw-an ang mga milyunes nga mga rason sa maong nagbalikbalik nga problema.
* * *
Daghan ang nag-reklamo karon sa gihimo sa LTO sa mga silingang probinsiya sa Sugbo.
Matod pa sa mga motorista, sama sa nangita lang sa “bikil” ang mga taga-LTO kay pangitaan gyod ka’g sayop. Mao kini hinungdan nga inig pakita na sa LTO, isig-tago na lang ang mga motorista kay nasayod sila nga makakita gyod sila og problema sa pagbayad sa mga “violations” nga ilang nahimo.
Pero husto sab ang LTO. Nagtuman lang sila sa ilang trabaho. Daghan lang gyod ang mga siaw nga ganahan mogamit sa ilang sakyanan bisan kon dili husto ang ilang mga papeles o mo-drive nga walay lisensiya.
Unya ra ba kon madisgrasya, kusog dayon motiyabaw.