Dalaygon ang amendment ordinance nga gipangamahanan ni Cebu City Vice Mayor Raymond Alvin Garcia bahin sa Zoning Ordinance sa dakbayan nga maghatag og solusyon sa kakuwang sa parking area ug makatabang sa pagpaluag sa trapiko.
Giaprobahan sa Cebu City Council sa ilang regular session sa miaging Miyerkules, Abril 26, 2023, ang ikatulo ug katapusang pagbasa sa ordinansa nga nag-ulohan og “An Ordinance Amending Article II, Section 2, Article V, Sections 18, 12.1, C) and 12.2 ug Article IX, Section 5, of City Ordinance No. 1656, Otherwise Known as the 1996 Revised Zoning Ordinance of the City of Cebu.”
Kini nagtugot sa Cebu City Government sa paggamit sa trust fund ubos sa account sa parking area requirement exemption fees sa pagpalit og mga lote alang sa dugang pampublikong parking area o building.
Sa wala pa ang pag-amendar, gitugotan lang sa 1996 Revised Zoning Ordinance nga makatukod og parking building, apan wala kini maghisgot kon makapalit ba ang lokal nga kagamhanan og mga lote alang sa naasoy nga katuyoan.
Tukma ang ordinansa ni Garcia ning panahon nga paspas ang pagtuyok sa ekonomiya sa dakbayan, apan usa sa kaluha sa maong kalamboan mao ang problema sa trapiko.
Hinuon, masabtan usab nato kini nga kahimtang tungod sa kakaraan sa dakbayan nga nahimong unang sentro sa pag-abot sa kolonyalistang Espanyol. Parada o tartanilla lang ang nag-unang transportasyon libot sa dakbayan busa sakto lang ang gagmayng dalan.
Ulahi na usab kaayo ang balaod bahin sa pagtagana og parking spaces sa pagatukoron nga building. Busa, sagad sa mga karaang building labina sa downtown area, walay parking area. Ning panahona, nahimong dakong isyo ang parking area nga nag-okupar sa pipila ka bahin sa dalan.
Ug karon nga gipasar na ang amendment ordinance, ang Dakbayan pwede na makatukod og building alang sa multi-level parking area. Moderno, hapsay ug mahimo pa nga laing tinubdan sa kita sa dakbayan. Busa, paghangop ug takos sa suporta ang dalaygong ordinansa ni Garcia.
