Ex-con gipusil-patay; Pulis: hayan gi set-up

GIPUSIL: Nagbuy-od ang lawas ni Fernando Mariket human siya pusila sa wa pa mailhing gunman sa Martes sa kaadlawon, Mayo 2, 2023. Giingong way nakakita sa hitabo. / BENJIE B. TALISIC
GIPUSIL: Nagbuy-od ang lawas ni Fernando Mariket human siya pusila sa wa pa mailhing gunman sa Martes sa kaadlawon, Mayo 2, 2023. Giingong way nakakita sa hitabo. / BENJIE B. TALISIC

Ex-convict nga nga bag-o lang nakagawas sa bilanggoan gipusil-patay sa alas 3 sa kaadlawon sa Martes, Mayo 2, 2023, sa wa pa mailhing gunman sa sityo Tinabangay, Alaska, Brgy. Mambaling, dakbayan sa Sugbo.

Ang biktima managlahi og mga ngan sa duha ka managlahing mga identification (ID) card nga nakuha gikan kaniya.

Sa iyang driver’s license, Fernando Mariket samtang sa iyang voter’s ID, siya mao si Roel Marikit Gungob, 43, taga Brgy. Lamac, lungsod sa Consolacion, amihanang Sugbo.

Matod ni Police Senior Master Sergeant Anthony Adisaz sa Mambaling Police Station nga nahinabi sa Superbalita Cebu nga subay sa ilang nakuha nga impormasyon, ang biktima naglakaw sa eskinita, gituohang paingon na unta mopauli.

Nagtuo si Adisaz nga gisugat ang biktima sa gunman, gipusil sa makadaghan.

Ang biktima naigo sa wala nga mata, liog ug abaga hinungdan sa iyang hinanaling kamatayon.

Si Police Major Jonathan Beethoven Taneo, hepe sa Mambaling Police Station sa Cebu City Police Office (CCPO), nibutyag nga personal nga bangi ang posibleng motibo sa pagpusil.

Duna silay nakuha nga impormasyon nga ang biktima hayan na set up sa transaksiyon sa drugas hinungdan nga naabot sa dapit.

“Ex-convict man gud ning gipatay. Bag-o lang ni nakagawas. Ang kaso ani drugs ug illegal firearms. Ang among gitan-aw ani kini subay sa among mga nakuha nga kasayuran gidudahan nga na set-up ni siya sa iyang kasabot unya sa posibleng sa ilegal drugs pud ni nga ilang sabot,”matod ni Taneo.

Hinuon ila usab nga susihon ang ubang mga anggulo.

Ang Scene of the Crime Operation (Soco) dunay nakuha nga duha ka mga kabhang sa mga bala sa kalibre .45 nga pistola sa crime scene.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph