Na-knockout si Filipino boxing legend Manny Pacquiao sa usa ka kasong breach of contract nga gipasaka sa Paradigm Sports Management (PSM) batok kaniya sa United States.
Sa taho ni Los Angeles-based journalist Steve Angeles sa ABS-CBN News, ang PSM midaog batok sa Pambansang Kamao ng Pilipinas, 9-3, sa pinal nga desisyon sa mga hurado.
Ang kaso nagsubay sa pasangil sa PSM nga gitago ni Pacquiao ang iyang preexisting agreement sa laing promotional company - TGB Promotions – nga maoy hinungdan nga wala nakahan-ay og away ang PSM alang sa 8-division world champion.
Ang korte nimando ni Pacquiao nga mobayad og monetary damages nga nagbalor og $5.1 million (mga P282 million) sa kinatibuk-an ngadto sa PSM.
Nabahin kini sa $1.8 million damages ug $3.3 million nga gihatag sa PSM ngadto ni Pacquiao isip advance payment kaniadto.
Si Pacquiao mipirma og kontrata sa PSM, nga mao sab ang nagdumala ni mixed martial arts (MMA) superstar nga si Conor McGregor.
Sa ilang kasabutan, usa sa lihukon nga away sa PSM mao ang tali nila ni Pacquiao ug McGregor apan wala kini nadayon.
Human niini, nipirma og laing kasabutan si Pacquiao aron awayon niya si Errol Spence Jr. nga wala sab nadayon tungod kay naangol si Spence atol sa iyang training.
Hinuon, gipulihan si Spence ni Yordenis Ugas, kinsa nibuntog ni Pacquiao pinaagi sa unanimous decision niadtong 2001.
Mao kini ang katapusang away ni Pacquiao. (ESL)