Gibutyag sa chairperson sa committee on health sa Konseho sa dakbayan sa Mandaue, Dr. Nerissa Soon-Ruiz, ang resulta sa test sa Department of Environment and Natural Resources Central Visayas (DENR 7) sa ilang environmental surveillance sa Enero ning tuiga sud sa tulo ka metros nga easement sa dagkong mga suba sa dakbayan, nga positibo kini sa polio virus.
Matod ni Ruiz sa pakighinabi sa mga tigbalita sa Martes Mayo 2, 2023, ang polio o poliomyelitis usa ka sakit nga naghulga sa kinabuhi nga motakboy ngadto sa tawo ug pinaagi usab sa kontaminado nga pagkaon ug tubig.
Hinuon, gipasabot ni Soon-Ruiz nga ang polio strain nga na-detect mao ang sabin-like virus type o kadtong residual nga dili na makatakod.
Gipasabot niya nga ang virus mahimong gikan sa mga masuso nga nabakunahan sa anti-polio ug tipdas nga bakuna subay sa naandan nga pagbakuna sa Siyudad alang sa mga bata nga ubos sa usa ka tuig, ilabi na sa ilang mga hugaw.
“The residual virus will come out of the poop as long as the vaccination is fresh but it can’t really infect polio. It is already dead,” pasabot ni Ruiz.
Gipahinumdoman niya ang mga ginikanan nga paimnon ang mga bata og limpyo nga tubig ug siguraduhon nga pabukalan ang tubig aron mapatay ang bisan unsang kagaw niini.
Aron mapalig-on ang depensa batok sa maong sakit, ang Mandaue City Health Office (MCHO) nakig-uban sa dungan nga libreng immunization kick-off batok sa polio, tipdas, ug rubella sa Department of Health Central Visayas (DOH 7) nga gitawag og “Chikiting Ligtas. Programa” sa Martes, Mayo 2, 2023 sa Mandaue City Hall Grounds.
Ang kalihukan nagtutok sa libreng pagbakuna sa mga bata nga nag-edad 0-59 ka bulan ug 9 ka bulan hangtod 59 ka bulan sa tibuok Mayo, nga maoy labing daling mataptan sa maong sakit.
Ang rubella ug tipdas adunay komon nga mga sintomas, sama sa pula nga rashes, apan ang tipdas mas makatakod ug grabe.
Gikutlo ni Soon-Ruiz ang kamahinungdanon sa kalihukan, nipasabot nga ang pagpugong batok sa sakit medyo napasagdan sa panahon sa pandemya sa Covid-19.
“Ikaduha, nahadlok ang mga ginikanan sa pagbakuna tungod sa mga epekto. Giawhag namo ang mga inahan nga moadto ug dad-on ang ilang mga anak,” ingon ni Soon-Ruiz.
Matod ni Soon-Ruiz nga ang Barangay Health Workers (BHW) mohimo usab og house-to-house vaccination. (HIC)