Giusban pagbuntog sa University of the Visayas (UV) Green Lancers ang University of Southern Philippines Foundation (USPF) Panthers, 90-77, Game 2 sa finals series aron angkunon ang kampyunato sa First Mayor Inocentes Cabaron Invitational Inter-Collegiate Tournament ning Miyerkules, Mayo 3, 2023, sa lungsod sa Moalboal, Cebu.
Sa kadaugan, nahuman og sayo sa Green Lancers ang series, 2-0, ug naangkon ang P200,000 nga labing dakong ganti sa kompetisyon.
Human sa sikit nga kombati sa 1st quarter, ang Green Lancers ningpabulhot sa ilang opensa aron kontrolahon ang duwa hangtod na sa katapusang gutlo.
Usa ka 11-0 run ang gihimo sa Green Lancers aron inaton ang ilang labaw ngadto sa 40-26 sa 2nd quarter.
Ning-aksyon paggukod ang Panthers pinaagi sa three-point shot ni Christian Alilin apan gitubag kini sa Green Lancers og duha ka sunodsunod nga three-point shots gikan nila ni Froilan Maglasang ug Jim Paul Amistoso.
Sa halftime, ningburot ang labaw sa Green Lancers ngadto sa 51-33 ug wala na sila molingi pagbalik hangtod na sa katapusang gutlo.
Nagkanayon si Green Lancers coach Gary Cortes nga aduna sila’y adjustments nga gihimo sa opensa ug depensa sa aktuwal nga duwa ug mao kini ang nag-abli kanila og pultahan paingon sa kadaugan.
Gipangulohan nila ni Maglasang, Kenneth Brillo ug Kent Salarda ang Green Lancers pinaagi sa ilang 15 puntos matag usa samtang nidugang og 10 puntos si Amistoso.
Ang Panthers gipangulohan ni Winston Bingil pinaagi sa iyang 21 puntos samtang niamot og 19 puntos si Neon Chavez.
Nabulsa sa Panthers ang P150,000 nga ganti isip 2nd placer.
Human sa basketball, ang Moalboal mopahigayon og chess seminar ug tournament karong Mayo 5-7, arnis event karong Mayo 9, dayon-dayon volleyball ug Mobile Legends tournament karong Mayo 13. (ESL)