Adunay Metro Cebu Bike Lane Network nga adunay gitas-on nga 129 kilometros nga giinagurahan niadtong 2021. Naglangkob kini sa mga dakbayan sa Cebu, Mandaue, Lapu-Lapu ug Talisay. Ang Mandaue City naninguha nga makompleto kining ilang bike lane project kay nagkadaghan na ang mga tawo nga nanggamit og bisikleta.
Panahon na nga inspeksiyunon sa local government units (LGUs) ang ilang mga bike lanes kon gigamit ug magamit pa ba kini. Ang kadaghanan niini nangahupas na ang mga marka sa aspalto ug dili na kini maklaro tungod sa uwan ug init.
Nadiparahan usab nga adunay daghang mga sakyanan, labi na ang mga motorsiklo, nga mogamit niining maong agianan. Adunay mga higayon diin gigamit kini nga parkinganan sa nagkalainlain sakyanan. Aduna usab hinuoy mga biskleta nga dili mogamit sa bike lane.
Kinahanglang estriktuhon ang pagamit niining maong bike lane kay gigastuhan ra ba kini sa salapi sa mga magbubuhis.
Samtang kalapasan sa mga motorcycle rider ang pag-agi sa bicycle lane kinahanglang dakpon usab kining mga magbisikleta gawas sa maong lane. Daghan kitang nakita nga mga siklistang magpatuyang lang sa pagpadagan sa tunga sa kadalanan bisan kon anaa ang bike lane.
* * *
Gisaad ni Presidente Bongbong Marcos (PBBM) nga dili siya motugot nga gamiton ang Pilipinas nga “staging post” alang sa military action. Nagduda man gud tingali ang China nga mao kini gamiton sa US nga pundohanan sa mga armas igugubat ug pahulayanan sa mga sundawo kon magubat ang China ug Amerika tungod sa Taiwan.
Suma ni PBBM nga kining mga base militar sa Pilipinas nga gigamit sa US ubos sa Enhanced Defense Cooperation Agreement (EDCA) dili gamiton alang sa pagpangataki apan alang kini sa panahon nga magkinahanglan og panabang ang Pilipinas.
Unsaon man kaha pagbalibad sa Pilipinas kon magkagubat gayud ang US ug China nga obligado man kita sa pagpaluyo sa Amerika tungod sa atong Mutual Defense Agreement? Motuo ba kamo nga ang EDCA alang lamang sa pagpanalipod sa Pilipinas nga wala mag-interes ang US sa pagamit niini alang sa gubat? Sa laing bahin kon magkagiyera gayud ang duha ka mga nasod tungod sa Taiwan o kaha tungod sa inilugay sa West Philippine Sea (WPS), dili katuhoan nga dili bombahan sa China ang Pilipinas diin naay siyam ka mga dapit nga nahimutang ang EDCA bases.
Apan miinsister man si PBBM nga dili gamiton nga “staging post” ang Pilipinas alang sa military action, atong panghinauton nga dili siya madala sa pressure sa US. (mannyrabacal1144@gmail.com)