Suwayan paglangkat ni Shane Gentallan sa PMI Bohol Boxing Promotions ang iyang ikaduhang regional title sa iyang pag-challenge ni World Boxing Council (WBC) Asian Silver light flyweight champion Dian Xing Zhu sa co-main event sa “Kumong Bol-anon X” ning adlaw sa Sabado sa gabii, May 6, 2023, sa Guindulman Civic Center sa Guindulman, Bohol.

Gilaumang sagubangon sa 25 anyos nga si Gentallan ang labing lisod niyang tahas batok sa Chinese prospect.

Sa ikasiyam nga edisyon ning maong promosyon, naangkon ni Gentallan ang bakanteng World Boxing Organization (WBO) Youth minimumweight strap pinaagi sa makapaukyab nga second round stoppage batok kang Indonesian Faisol Akbar sa Calape, Bohol niadtong Pebero 25, 2023.

Kining maong kadaugan seguradong makahatag og dugang kadasig ni Gentallan alang ning bag-o niyang tahas.

Si Zhu, 26, niangkon sa iyang bakus pinaagi sa makapaukyab sab nga first round TKO nga kadaugan batok kang Thai Narathip Sungsut niadtong Marso 27, 2023 sa Thailand.

Naggunit si Zhu og 7-1, 6KOs nga rekord samtang si Gentallan naghupot og 7-0, 4KOs nga rekord.

Sa laing co-main event, ang stablemate ni Gentallan nga si Jake Amparo makigbatok ni Clyde Azarcon alang sa Philippine Games and Amusements Board minimumweight title.

Si Amparo naggunit og 12-4-1, 2KOs nga rekord samtang si Azarcon naghupot og 17-6-1, 6KOs nga baraha.

Sa undercard, mag-away sila si Angilou Dalogdog (6-0, 2 KOs) batok Dennis Endar (4-0-1, 3 KOs), Reymart Tagacanao (4-0, 4 KOs) batok Ruel Julian (4-4, 1 KO), Gerwin Asilo (4-0, 1 KO) batok Ariel Antimaro (4-1-1, 2 KOs), Christian Balunan (6-0, 3 KOs) batok Malupangue (9-8-4, 6 KOs).

Magbinukbokay sab sila si Pablito Balidio (7-3-3, 2 KOs) batok Vergilio Silvano (21-11-2, 12 KOs), Jason Tinampay (13-17-1, 11 KOs) batok Marjhun Tabamo (10-19-4, 2 KOs) ug Niño Rio Saoy (1-0) batok Dave Barlas (5-6-1, 3 KOs).