Gibasura sa Office of the Ombudsman ang reklamo nga gisang-at ni Inayawan Barangay Captain Kirk Bryan Repollo batok sa kanhi pangulo sa Cebu City Department of Public Services nga si John Jigo Dacua tungod sa giingong dili maayong pagdumala sa basura sa dakbayan sa Sugbo.
Si Repollo nipasaka og kaso batok kang Dacua ug ni anhing mayor Edgardo Labella atubangan sa Office of the Ombudsman niadtong Enero 7, 2021 tungod sa gross neglect of duty ug sa paglapas sa Republic Act No. 7160 o ang Local Government Code ug RA 9003 o Ecological Solid Waste Management Act of 2000.
Gibasura usab sa Ombudsman ang reklamo batok ni Labella tungod sa kamatayon niini. Ang mayor namatay kaniadtong Nobiyembre 19, 2021.
Sa pito ka pahina nga desisyon sa Office of Ombudsman nga gisulat ni Lucielo Ramirez Jr., graft investigation and prosecution officer III ug giaprobahan ni Ombudsman Samuel Martires niadtong Mayo 3, 2023, gitumbok nga samtang adunay problema sa paglabay sa basura sa Barangay Inayawan , apan kini tungod sa daghang mga hinungdan nga dili makontrol ni Dacua.
Gitumbok sa Ombudsman nga ang problema sa paglabay sa basura nagagumikan sa pagsira sa transfer station nga nahimutang sa Barangay Inayawan.
Nisamot pa tungod sa pagpatuman sa mobility restrictions dala sa coronavirus pandemic ug limitado nga gidaghanon sa mga dump truck sa barangay nga maoy mohatod sa mga basura ngadto sa landfill sa Barangay Binaliw.
“While the records show that there was a garbage disposal problem in Barangay Inayawan, the evidence does not suffice to establish that respondent Dacua is liable for gross neglect of duty,” suwat sa Ombudsman sa iyang hukom. (Samtang ang mga talaan nagpakita nga adunay problema sa paglabay sa basura sa Barangay Inayawan, ang ebidensya dili igo aron maestablisar nga ang respondent nga si Dacua adunay tulubagon sa grabe nga pagpabaya sa katungdanan.)
Ang Ombudsman namahayag usab nga ang problema sa basura mahimo unta nga malikayan o maminusan kon ang complainant nidala sa iyang problema ngadto kang Dacua “at the earliest opportune time” (sa labing sayo nga panahon).
Gipahinumdoman usab sa Ombudsman si Repollo nga aduna usab siyay responsibilidad sa pagmonitor sa kahimtang sa basura sa iyang barangay isip barangay kapitan.
Sa nangaging mga taho sa SunStar Cebu, ang pagka-expire sa kontrata tali sa Siyudad ug sa pribadong hauler nga nagdumala sa Inayawan transfer station nga niresulta sa wala makolektang basura maoy nakaaghat ni Repollo sa pagpasaka og kaso batok sa duha ka mga opisyal.
Ang kontrata tali sa Siyudad ug sa pribadong hauler natapos niadtong Disyembre 2020.
Sa samang taho, si Repollo nagkanayon nga wala pahibaw-a ang mga opisyal sa barangay sa wala pa ma-terminate ang kontrata ug wala usab silay tabang gikan sa City Government human napupos ang kontrata. (JJL)