Vallena: Bike lanes sa Metro Cebu

Vallena: Bike lanes sa Metro Cebu

Bisan asa nga suok sa kalibutan naa ang conflict tali sa mga siklista ug mga drayber sa motorized nga mga sakyanan. Di lang ni dinhi sa Pilipinas nangahitabo.

Apan mas daghan dinhi sa Pilipinas ang mga kaso sa conflict tali sa mga siklista ug drivers. Unsaon nga ang mentalidad sa mga drayber mao man nga ang karsada alang lang sa motorized nga mga sakyanan. Way labot ang mga biseklita.

Kon buot baya huna-hunaon, ang nagbadhasbadhas og una sa mga karsada mao ang mga biseklita. Nisunod lang ang motorized nga mga sakyanan dihang nanaghan na ang mga biseklita sa karsada.

Kon wa niigo ang Covid-19, ang kagamhanan wa nakahuna-huna sa pagpamutang og bike lanes. Ang nakaparat kay diretso ang pagpamutang, way mga pagtuon kon unsa nga mga dan ang haom butangan niini.

Wa say konsultasyon sa sektor sa mga siklista nga naa sa nagkalainlaing discipline. Nakurat na lang mi nga naa diay mga bike lane nga gipamutang.

Didto na lang gani ko nasayod sa among reporters kalabot sa mga bike lane nga gipamutang sa mga karsada sa upat ka mga siyudad: Cebu City, Mandaue, Talisay ug Lapu-Lapu.

GITUN-AN

Sa wa pa ug gituki pa ang bike ordinance sa Siyudad sa Sugbo, ang sektor sa mga siklista nipahigayon og mga pagtuon sa mga karsada sa siyudad nga mahimong mabutangan og bike lanes.

Wa mi nag-ingon nga ang tanang mga karsada sa Cebu City. Di sab tanang major roads ang pabutangan.

Di lang pinaagi sa pagtan-aw sa karsada ang pagtuon, kon di mas maayong mosubay ka nga nagbiseklita. Busa, ang mga siklista nga giporma pinaagi sa Tindak Sugbo Bike Coalition nga naporma pinaagi sa mga tinun-an ug nagkadaiyang mga organisasyon, nipahigayon og Sunday bike rides.

Gikinahanglan man gud ang mga pagtuon kay pinaagi sa experience, dinhi nimo mahuna-hunaan kon maayo ba o di ang paghimo sa usa ka butang. Maayo ba ang bike lanes sa usa ka karsada kay di tanan okay ra butangan niini.

Millions ang gigasto sa kagamhanan, apan napuslan ba kaha sa kinabag-an ang bike lanes?

Frankly, sa tanang mga karsada nga akoang naagian, ang medyo gamit mao lang ang sa P. del Rosario, apan sa uban wa gyud.

HAWANAN UNA

Mao ni ang akong gisulti sa akong mga higala nga mas maayong unahon ang edukasyon sa mga motorista ug publiko kalabot sa ordinansa sa Siyudad.

Nakadayeg ko sa gibuhat sa Sugbo Bike Lanes Board bike patrol nga nanakop sa mga drayber ug tag-iya sa mga sakyanan nga nakababag sa mga bike lane.

Ambot kon ang traffic enforcers nangapil ba sa pagpatuman sa ordinansa sa Siyudad sukad nga naa na ang bike patrollers.

Di baya maato ug makasabot sab ta nga dunay mga dapit nga sila magpanagana sa pagpatuman sa ordinansa kay kuyaw alang sa ilang seguridad, apil na diha sa V. Rama, habig sa Brgy. Calamba.

Mas maayo tingali suwayan ang pagtutok sa usa o duha ka karsada, di idungan tanan. Pinaagi niini, anam nga matisok sa panghuna-huna sa mga drayber nga kalapasan diay sa ordinansa ang ilang gibuhat.

Sama gud sa overnight parking, daghan na ang nagmatngon aron di ma clamp ang ilang sakyanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph