Mga basketball fans sa nasod ilabi na kadtong nagsunod sa nagpadayon nga NBA playoffs mopunting na usab sa ilang mga mata karong buntag (takna sa Pilipinas) ang Game 3 sa LA Lakers-Golden State Warriors semifinals round sa West Conference.
Bisan tuod og nakuha sa Lakers ang ilang misyon nga makakuha og usa ka daog sa korte sa Warriors aron modap-ig kanila ang homecourt advantage, misamot ang kaikag sa mga dumadapig sa matag habig human matabla ang series, 1-1, sa dihang gimasaker sa Warriors ang Lakers sa Game 2, 127-100.
Dunay mga pangagpas nga ang maong kadaugan maoy bunga sa epektibong adjustment nga gihimo sa Warriors diin ilang napakgang si Anthony Davis kinsa nalimitahan lang og 11 puntos ug pito ka rebounds sa maong duwa.
Dakong sukwahi kini sa kadaugan sa Lakers sa Game 1 diin si Davis mipuga og 30 puntos ug 23 ka rebounds.
Gitug-an ni Davis nga dimalas gyud siya niadtong gabhiona kay ang iyang mga itsa nga mao ra usay iyang gibuhat sa ilang kadaugan sa Game One wa mangigo.
Iyang giangkon nga ang adjustment sa depensa sa Warriors maoy usa sa mga hinungdan nga pugdol ang iyang opensa.
Kredito ngadto ni Draymond Green kinsa maoy gitahasan sa pag guwardiya ni Davis sa Game Two puli ni Kevin Looney.
Pero wa kalikayi usab ang laing anggulo sa obserbasyon sa Game 2. Unfair man tuod alang sa Warriors apan angay usab kini ikonsiderar.
Kon atong makita sa statistics, dili lang kay si Davis ang mibahar sa Game 2.
Hasta ang ilang mga backups ubos ra usab kaayo ang nahimo.
Pananglitan si Dennis Schroder ug D’Angelo Russel nga mitali og tag 19 puntos matag usa sa Game One, igo lang naka kuwatro puntos ug 10 puntos sa Game 2.
Sa ato pa, wa usab manglihok ang mga backups ni Davis nga mao untay magsilbing decoy niya.
Si Rui Hachimura mipaksit og 21 puntos pero sagad niini mga waste basket na. Not to mention sa below par performance ni Austin Reaves. Wa pa nato hisguti dinhi ang performance ni LeBron James.
Sa round one sa playoffs batok sa Memphis, ang Lakers nakakawat sa Game One sa korte sa Grizzlies, apan napildi/nagpapildi usab sa Game Two. Hinuon nakuha nilang homecourt advantage.
Ilang gidepensaan ang Games 3 ug 4 sa ilang korte. Nibalik man tuod ang series sa korte sa Memphis apan gitapos kini sa Lakers sa Game 6 didto sa LA.
Di ba kaha mao usab kini ang pattern nga gisubay sa Lakers batok sa Warriors?
Ang Lakers wa pa mapildi sa ilang korte sukad pagsugod sa playoffs, ug di usab nato ikasalikway ang kapabilidad sa determinadong Warriors nga mobuak niini.
Mao ni rason nganong ang Lakers-Warriors series is one of the best playoff match in NBA history.