Tungod sa grabeng kainit, ang Mandaue City Barangay Response ug Purok Responders Teams gamiton aron mamonitor ang ilang mga lumolupyo ug ubang mga silingang barangay nga nagkinahanglan og medikal nga pagtagad.

Si Buddy Ybañez, pangulo sa Mandaue Disaster Risk Reduction and Management Office (MDRRMO), niingon sa Sunstar Cebu sa Sabado, Mayo 6, 2023, nga kabahin kini sa ilang pagpangandam sa El Niño phenomenon nga posibleng moigo sa nasod sumala sa pahibalo sa Philippine Atmospheric, Geophysical and Astronomical Services Administration (PAGASA).

Hinuon, wa nihatag si Ybañez kon pila ka tawo ug teams ang gamiton.

Lain sa ilang pagpangandam mao ang pagpahigayon og pagbansay-bansay alang sa Barangay Response Teams (BRTs) ug Purok Responders Teams (PRTs) aron mapalig-on ang basic rescue techniques sama sa basic firefighting, patient extrication, cardiopulmonary resuscitation (CPR), ug basic life support.

Dugang pa niya nga nagpadayon sila sa pagpahigayon og Information, Education, and Communication (IEC) campaigns, ug uban pa, pinaagi sa “recorida” (public announcements).

Gitambagan usab ang mga residente nga mo-contact kanunay ug makig-coordinate sa ilang mga focal person sa barangay DRRM.

Niadtong Martes, giisa sa Pagasa ang El Niño alert, nga gipaabot sa ahensya nga moigo sa nasod sugod sa Hunyo.

Bisan sa wala pa magsugod, ang katawhan nakasinati na sa grabeng kainiton, ug ang labing ulahi nga heat index nga natala sa Pagasa nisaka ngadto sa 49 degrees Celsius sa Guiuan, Eastern Samar, gikan sa Marso 1 hangtod Abril 27.

“Recent conditions and model forecasts indicate that El Niño may emerge in the coming season (June-July-August) at 80% probability and may persist until the first quarter of 2024. With this development, the PAGASA El Niño Southern Oscillation Alert and Warning System is now raised to El Niño Alert,” matod sa Pagasa sa ilang pamahayag.

HONORARIUM

Sa laing bahin, si Ybañez nipahibawo nga ang mga sakop sa BRT mahimong makadawat og P2,000 nga honorarium sa dihang giaprobahan niadtong Huwebes, Mayo 4, sa Konseho sa Dakbayan sa Mandaue sa unang pagbasa ang draft ordinance nga naghatag sa BRT og binuwan nga honorarium. (HIC)