Di una ipadayon sa Cebu City Transportation Office (CCTO) ang ilang dry run sa one-way traffic scheme sa tulo ka mga flyover sa dakbayan sa Sugbo nga sugdan unta sa pagpatuman sa Lunes, Mayo 8, 2023.
Si Cebu City Traffic Management Council chairman manlalaban Rico Rey Francis “Koko” Holganza nipahibawo nga mao kini ang ilang nakab-ot nga hukom sa Kagamhanan sa Dakbayan sa Sugbo.
“The Cebu City Government, through TMC Board and CCTO is postponing indefinitely the planned dry-run for the “one-way flyovers” traffic scheme,” matod ni Holganza sa iyang pamahayag.
Duha sa flyovers naa sa Archbishop Reyes Avenue (usa duol sa Ayala Center samtang ang laing usa sa Technical Education and Skills Devt. Authority) samtang ang ikatulo naa sa mga eskina sa Gov. M Cuenco ug Dan A.S. Fortuna sa Brgy. Banilad.
Gikompirmar usab kini sa pangu sa CCTO, Raquel Arce, sa usa ka pamahayag sa Sabado, Mayo 6, 2023.
Matod ni Arce nga ila kining nakab-ot human sa mga komentaryo sa publiko nga nabalaka sa di maayong epekto niini sa trapiko.
Bisan ang sektor sa patigayon nabalaka sa dautang epekto niini sa mga negusyo.
Matod ni Arce nga ilang buhaton ang tanan nga mangita og paagi sa pagpaluag sa dagan sa trapiko sa Banilad-Talamban corridor.
“We have heard and are seriously considering all the valuable constructive comments raised during the week since we set up the traffic advisory. We thanked all who gave their inputs and suggestions,” matod ni Arce.
NABALAKA
Usa sa mga nipadayag og kabalaka sa epekto mao si Cebu City Councilor James Cuenco.
Si Cuenco, chairman sa komite sa transportasyon, niingon nga positibo man o dili ang epekto sa eksperimento, matubag kini kon sugdan na.
“Definitely it will have an impact on the businesses in the area. But, whether it will be positive or negative, only the results of the experiment can tell,” matod ni Cuenco sa usa ka text message sa SunStar Cebu.
Base sa mga signage nga gibutang sa CCTO, ang mosunod nga traffic scheme ipatuman unta:
Sa flyover duol sa Tesda
* Ang mga sakyanan nga paingon sa Banilad ug Talamban, kinahanglang mogamit sila sa Tesda-Bureau of Internal Revenue (BIR) flyover;
* Ang mga sakyanan nga mopaingon sa Archbishop Reyes Ave., Ayala, ug Escario Street area kinahanglang mopaingon sa ubos sa flyover;
Alang sa flyover duol sa Ayala Center Cebu
* Ang mga sakyanan nga paingon sa Banilad ug Talamban kinahanglang mogamit sa Archbishop Reyes Ave.-Ayala flyover;
* Ang mga sakyanan nga paingon sa Archbishop Reyes Ave., Ayala Center, ug Escario St.
Ang one-way traffic scheme ipatuman sulod sa 24 oras.
Ang Facebook post sa CCTO nakakuha og lainlaing mga reaksyon gikan sa mga netizen, diin ang uban kanila nagkwestyon sa experimental policy.
“Mas mosamot na hinuon ang traffic ani,” komento sa usa ka netizen. (REV, JJL)