Nadepensaan ni Mexican Canelo Alvarez ang iyang undisputed super middleweight title pinaagi sa dominanteng unanimous decision nga kadaugan batok kang British John Ryder ning Dominggo, Mayo 7, 2023 (PH time) sa Guadalajara, Mexico.
Nagkadugo ang ilong ni Ryder unya natumba siya sa 5th round human naigo sa 1-2 nga kumbinasyon ni Alvarez apan nakamaneho gihapon siya paghuman sa away.
“I hit him too much in the head and he did not go down,” matod ni Alvarez, kinsa karon pa nakabalik og away sa iyang yutang natawhan gikan niadtong 2011.
“I´ve always said it, when they fight me, they give their 100 percent, it gets complicated because they usually give me the fight of their lives.”
Ang usa ka judge mitali og 120-107 sa iyang scorecards samtang ang laing duha, pulos nitali og 118-109, tanan pabor ni Alvarez, kinsa nisaka sa 59-2-2, 39KOs nga rekord.
Nagkanayon si Ryder nga sa iyang pamati, nabuak ang iyang ilong sa 2nd round pa lang ug mao kini ang nakaapekto sa iyang away.
Garbo lang gihapon si Ryder nga bisan niini, wala siya napaundang ni Alvarez sa hingpit.
“He´s probably past his best, he could not get me out there, he wanted to stop me and could not do it,” matod ni Ryder, kinsa nidakin-as sa 32-6, 18KOs nga baraha. “It could have been a little different with out the problem to my nose, it took me a few rounds to get adjusted”. / AP