Barrita: Covid-19 di na global health emergency

Barrita: Covid-19 di na global health emergency

Gideklarar sa World Health Organization (WHO) niadtong Biyernes, Mayo 5, 2023, nga ang Covid-19 pandemic, nga mikalas sa mokabat sa 20 ka milyon ka mga kinabuhi sa tibuok kalibotan, di na usa ka global health emergency.

Mao kini ang gipahayag ni Tedros Adhanom Ghebreyesus, pangulo sa WHO. Sanglit di na man kini usa ka global health emergency, mag-iya-iya na lang ang mga nasod sa pagtubag sa Covid-19 sa ilang mga dapit

Ang WHO International Health Regulations Emergency Committee nagtagbo sa ika-15 nga higayon niadtong Huwebes, Mayo 4, ug mirekomendar kang Tedros sa pagtapos sa Covid-19 isip usa ka public health emergency of international concern (PHEIC), ug iya kining giuyonan.

* * *

Nawagtang na ba ang Covid-19 nga nakagusbat sa ekonomiya ug sa kinabuhi ug panginabuhi sa milyon ka milyon ka mga tawo sa tibuok kalibotan? Wa. Naa gihapon ang Covid-19 ug nagpabilin kini usa ka hulga sa tibuok kalibotan, matod pa sa WHO.

Apan di na kini usa ka public health emergency. Ang maong virus tipik ug kabahin na sa atong adlaw-adlaw nga panginabuhi. Sama sa gihapon, maglikay ug di magpabaya kadtong duna nay gihambin nga mga balatian ug dali kaayong matakboyan sa laing mga sakit.

Unom ka semana sa wa pa ideklarar nga pandemiya ang Covid-19, gideklarar kini nga usa ka PHEIC niadtong Enero 2020. Nag-antos ang katawhan sa tibuok kalibotan sa kapin sa tulo ka tuig sa maong pandemiya nga karon gilibkas na sa WHO.

* * *

Ang makapabalaka mao kining giingon ni Dr. Mike Ryan, executive director sa WHO Health Emergencies Programme. Matod niya, “In most cases, pandemics truly end when the next pandemic begins. I know that’s a terrible thought but that is the history of pandemics.”

Di matapos ang usa ka pandemic kon di magsugod ang laing pandemic. Unsa na man sab kaha nga balatian ang mohugpa sa kalibotan? Andam ba kaha kita nga mosagubang niini human sa atong kasinatian sa Covid-19?

Matod pas taga Cabadiangan, pagkanindot kaha kon ang sunod nga virus nga mohugpa makapahimong ambongan ug maanyag ug adunahan pa gyud sa mga tawo nga matakboyan niini. Di malalis nga daghan kaayo ang magpatakod.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph