Patay nang nidangat sa tambalanan ang pasahero sa habalhabal human pusila sa wa mailhing mamumuno sa Happy Valley, Barangay Guadalupe, dakbayan sa Sugbo, pasado alas 4:00 sa hapon, Dominggo, Mayo 7, 2023.
Ang biktima giila sa kapulisan nga si Isidoro Roy Pardillo Dayono alyas Negro, hingkod ang edad ,ug taga Barangay Kalunasan, siyudad sa Sugbo.
Si Police Major Kenneth Paul Albotra, hepe sa Guadalupe Police Station, niingon nga kining biktima kanhi napriso sa miaging tuig tungod sa kaso sa illegal nga drugas.
Nasayran sa kapulisan subay sa ilang imbestigasyon nga nibalik sa pagduwa sa illegal nga drugas si Dayono.
Personal nga anggulo ug kabahin sa illegal nga drugas ang gitutokan karon sa Guadalupe Police Station sa kasong pagpusil-patay sa biktima.
Si Jayson (nagpatago sa tinuod ngan, drayber sa habalhabal nga maoy gisakyan ni Dayono, nibutyag nga gikan sila sa Barangay Kalunasan.
Si Dayono, matod pa, nagpahatod kini sa Happy Valley.
Samtang nagbiyahe paingon na sa Happy Valley, kalit nga gipahunong ni Negro ang motorsiklo, dungan sa duha ka buto sa armas nga milanog ug nahagba ang biktima.
Dali nga gidala si Negro sa tambalanan. Wala gisalikway sa kapulisan ang anggulo bahin sa druga ang motibo sa pagpusil sa biktima.
Atol ning pagsuwat, ang Guadalupe Police Station nihimo og operasyon sa pag-ila ug pagsikop sa mamumuno.