“Ing mikatawang kaladwa malyari yang miyawat karing tulang panamdam,
agya mang ing panglasa karing bage panamdam mandatila. Dapot, ing pamanampat
karing pamakiyugne kareti kapamilatan ning pamandanas lakwas matas
a panglasa, makapanatag ya king panimanman.”
~ Dalit ning Kakataskatasang Panginwan | Dangka 2: Sunis 39)
(The Song of God, 2:38-39)
“Ing taung e maliligalig karing alang-patugut a agus ding kapagnasan - -
mengari karing ilug palub king dayatmalat -- ya mu ing tanggap kapayapan,
at aliwa itang taung magsumikap bang kumabsi la ring panamdam.
Ing taung mitabili na ngan karing sablang kapagnasan para king kaganapan
ding panamdam, a mabibye malaya karing sablang kapagnasan,
a mitabili karing sablang panamdam kapamandyan at alang maling pangasarili - -
ya kabud ing mika-tune kapayapan.”
~ Dalit ning Kakataskatasang Panginwan | Dangka 2: Sunis 70-71
(The Song of God, 2: 70-71)
“Ding talasuyu ning Ginu mikakabus la karing miyayaliwang kauryang kasalanan
uling mamangan lang pamangan a miyampang pamu king pamidaun.
Ding aliwa, a magsaryang pamangan kabud mu para king pangsarili dang ikatula,
mamangan lang kabud kasalanan.”
~ Dalit ning Kakataskatasang Panginwan | Dangka 3: Sunis 13
((The Song of God, 2:3-13)
“Ing meging malayang taung iti e ya magagayuma king makalabwad a tula ring panamdam
o panglwal a bage-bage dapot parati ya king kalibwan, nanamnaman na ing nyaman kilub.
King paralang ayni ing taung makikilala na king sarili nanamnaman na ing alang kapupusang ligaya, uling magpamisan ya king Kakataskatasan
Ing byasang tau e ya magkyabe karing panibatan ning kasakitan, a pauli ning pamitagmu karing pagmulan ding kasakitan, a pauli ring pamitagmu karing panamdam panglabwad.
O anak nang Kunti, ding tulang deti atin lang kamumulan at kapupusan,
inya pin mo ing byasang tau e ya magkatula kareti.
Bayu ne lakwan ing kasalungsungang katawan, nung ninu mang makapangiling
karing aligwat ding makalabwad a panamdam at makapangilag king sikanan
ding kapagnasan at kamwa, metung yang yogi at maligaya ya keti king yatu.
Ninu mang ing ligaya na ati kilub, magalo ya lub, matula ya lub, at maslag ya lub,
ing kamatutwan pantas yang kabalan. Mitimawa ya king Kakataskatasan,
at katatawlyan dasnan ne ing Kakataskatasan.”
~ Dalit ning Kakataskatasang Panginwan | Dangka 5: Sunis 21-24
((The Song of God, 5:21-24)
“Pauli ning nung ninu mang agaganaka na Kung alang pamikaliwa, saguli kung akwa,
O anak nang Prita, uli ning alang patugut nang pamisuglung king makaparikil a kasuywan.”
Kaybat da kung disnan, ding dakilang kaladwa, a yogi king pamagdikil,
e na la mibabalik pa king pangsaguling labwad, a kisna king kasakitan,
uling disnan da na ing pekamatas a kapantasan.”
~ Dalit ning Kakataskatasang Panginwan | Dangka 8: Sunis 14-15
((The Song of God, 8: 14-15)
***
Nanu mang depatan tamu, mayap man o marok ating karampatang ablas tambing o kaybat ning makabang panaun. Nanu man iti ating kablas o ablas; mayap man iti o marok ating kapalit a mayap o tula o ligaya o ating sukling marok o maplas uling ing lawe o turing ning Ginu kekatamu ngan pante at patas.
Ala yang tutulak, ala yang kakabiran. Nung mayap ing depatan mu ating kayaliling galal, at nung marok, ating sukling dusa. Batas namu ning kalikasan, a Ya ing penibatan, a nung nanung tenam mu ya mu namang pupulan mu. Nung miyasik kang pale—pumalut kang pale.
Tinanam kang lugud—pumupul kang lugud. Dapot ita ing pamiyaliwa ning Ginu kekatamu. Tinanam kang karokan—yagyagan na kang sumisi ba kang mipatawaran, uling Ya ing Ginung Talapangabus da ring pekamasikan pangasaldak.