Giuktaba og usa ka semana ang pagpasar sa Cebu Provincial Board sa ilang resolusyon nga mag-awhag sa Department of Education (DepEd) nga ibalik sa Hunyo ang pag-abli sa klase alang sa mga tinun-an sa elementary ug secondary.
Si third district Board Member John Ismael Borgonia maoy niduso sa resolution atol sa ilang regular session apan gusto sa iyang mga kauban nga bokal nga kuhaan usa sa ilang mga pamahayag ang mga sakop sa Provincial School Board nga gipangulohan ni Cebu Governor Gwendolyn Garcia.
Usa sa mga gibasehan ni Borgonia mao ang grabeng kainit nga nasinati karon nga delikado alang sa panglawas sa mga tinun-an ug magtutudlo kay magpunsisok sulod sa classrooms.
Mabalda usab ang pagtuon sa mga bata gumikan sa kataas sa mga holiday sama sa Holy Week, Araw ng Kagitingan sa buwan sa Abril ug sa Mayo nga gisaulog ang Labor Day, matod sa resolusyon.
Gamiton usab ang mga eskwelahan alang sa pagpangandam sa midterm, presidential ug Sangguniang Kabataan ug Barangay Elections nga makabalda sa klase sa mga tinun-an.
“It is timely, relevant and utmost necessity to provide alternative avenues to solve this problem in order to deliver quality education to the students,” matod sa resolution ni Borgonia.
Apan ang iyang resolusyon gi-defer una ug ilang tukion pag-usab sa regular session sunod semana, Mayo 15, 2023.