Ang Department of the Interior and Local Government (DILG) mopahigayon og tinuig nga performance audit sa tanang Anti-Drug Abuse Councils (Adacs) sa mga lokalidad sa tibuok nasod aron masiguro ang ilang aktibong partisipasyon sa kampanya batok sa ilegal nga drugas, matod sa usa ka opisyal sa Lunes, Mayo 8, 2023.
Si Interior and Local Government Secretary Benjamin Abalos Jr. niingon nga adunay kinatibuk-an nga 81 ka provincial Adacs, 146 ka city Adacs, ug 1,488 municipal Adacs sa nasod kansang mga tahas mahinungdanon alang sa whole-of-government approach sa pakigbatok sa ilegal nga drugas.
“The war on drugs is everyone’s business. Hindi lamang ito laban ng DILG, ng Philippine National Police (PNP), o ng Philippine Drug Enforcement Agency (PDEA). Ito ay laban nating lahat kaya dapat nating siguruhin na kasama natin ang mga pamahalaang lokal sa kampanyang ito,” matod niya sa usa ka pamahayag. (Ang gubat batok sa drugas atoang tanan. Dili lamang kini away sa DILG, sa Philippine National Police (PNP), o sa Philippine Drug Enforcement Agency (PDEA). Kini away natong tanan mao nga angay natong siguruhon nga kauban nato ang mga gobyernong lokal sa kampanya niini.)
Ang mga Adac i-assess base sa mosunod nga mga criteria: organisado nga lokal nga Adac; pagpahigayon sa quarterly nga mga miting; alokasyon sa pundo alang sa pagpatuman sa anti-drug activities nga gipakita sa Peace and Order and Public Safety (Pops) Plan; pagpatuman sa mga plano ug programa sa Adac; suporta alang sa mga Adac sa component local government units (LGUs); ug kabag-ohan.
Matod ni Abalos nga lakip sa mga mandato sa Adac mao ang pagtukod ug pagpalig-on sa Community-Based Drug Rehabilitation (CBDR) aron mahatagan og dalan ang mas maayong kinabuhi sa mga nagumon sa ilegal nga drugas.
Iyang giawhag ang LGUs ug Adacs nga makig-alayon sa mga non-government organization (NGOs) ug pribadong sektor aron palig-onon ang ilang rehabilitation ug drug education campaign isip kabahin sa kampanya. (TPM sa SunStar Philippines)